Mizo hla phuah thiam, 'Poet of the Century' tia koh Pu Rokunga pian champhaphak vawi 100-na lawmna vawiina Vanapa Hall-a Rokunga Memorial Society in an buatsaih chu Chief Minister Pu Lal Thanhawla’n a hmanpui.

Chief Minister chuan chawimawi phu, chawimawi tlak te chawimawi nachang hriat hi a ropuiin a hlu a ni a ti a. Mizote zinga hla phuah thiam chungchuang Rokunga kum za tlin lawmna denchhena Rokunga Memorial Society in amah chawimawina hun an buatsaih chu a ropui hle a ni a ti a. Midangte hian Mizote hi min rawn chawimawi mai dawn lova, chuvangin keimahni kan inchawimawi hian midangte tan hnam zahawmah kan insiam a ni a ti.

Chief Minister chuan Rokunga hla te hian ram leh hnam humhalh kawngah hmalak dan tur kawng tam tak min kawhhmuh a, a hla te hi ram humhalh nan a pawimawh em em a ni a ti a. Mizo nationalism chungchangah intlansiak ang ten kan lang thin a, nationalism hi hmuiah chauh a awmlo a ni tiin, Rokunga kha nationalist tak a ni tih a hla ah te a hriat theih a ni a ti a. Rinna lamah pawh a hla atangte hian a thukzia a lang a ni a ti. Chief Minister chuan he kum za tlin lawmna hi ram leh hnam humhalhna kawngah infuih thar nan hmang theuh turin mi zawng zawng a sawm a ni.

Chief Minister hian Rokunga puala ‘Mizo Studies Journal’ tih lehkhabu a tlangzarh bawk a ni.

Rokunga Memorial Society hi 22nd March 1999 khan din a ni a. A thil tum bulpuite chu Rokunga Memorial Lecture leh Seminar buatsaihte, Rokunga Hla Kutpui huaihawt te, A hla te a bua siama tihchhuahte leh Lungdawh leh a lim siam te a ni. A kum za tlin lawmna kal zel denchhen hian essay, hla leh lemziah ahte intihsiakna buatsaih a ni a, heng bakah hian Rokunga puala seminar te buatsaih a ni bawk a ni.

Attachment

  • Loading attachment...