Mizoram Sawrkar hnuaia pension tawhte inhlawmkhawmna pawl lian ber Mizoram Civil Pensioners’ Association (MCPA) chuan vawiin khan Vanapa Hall-ah an pawl inkhawmpui General Assembly vawi 40-na an hmang. He hun hi School Education Minister Pu H. Rohluna’n a hmanpui a ni.

Pu H Rohluna chuan MCPA member ten an hun tha, an tha leh zung, an thiamna leh an finna te chu Sawrkar leh ram leh hnam tan an hman thu sawiin an tawnhriat zau tak atangte in tunlai mite, a bik takin sawrkar hnathawk lai mek ten an neih ngei a rin thu a sawi. Minister chuan MCPA member te chu sawrkar hna atangin chawl tawh mahse ram leh hnam tan tih thei an la nei a ni tiin an ngaihtuahna leh an finna te chu ram hmasawm nan seng zel turin a chah a, an thiamna, an finna leh an tawn hriat te chu ramin a la mamawh a ni, a ti bawk.

Minister chuan Sawrkar sum indaih lohna avangin pensioners te duhthusam in duat thei lo mahse a theih ang chin chinah Sawrkar chuan a duat a ni, a ti. Pu H Rohluna chuan MCPA member te chuan ram nunphunga mawhphurhna sang tak an la nei nia a hriat thu sawiin mahni hmazawn ah theuh he mawhphurhna hi hlen chhuak a, ram leh hnam dinchhuah theih nan theihtawp chhuah thin turin kalkhawmte chu a ngen bawk.

He hunah hian Minister chuan MCPA Annual Magazine 2014 ‘Hruaitu’ tih chu a tlangzarh nghal a ni.

General Assembly hi an Pawl President Pu H Raltawna, IAS (Retd.) chuan kaihruaiin Pathian hnenah inhlanna Rev. Lalhnuna’n a hmang a, General Secretary in kumkhat chhunga an pawl hnathawh leh hmalakna hrang hrangte a tarlang a, Financial Secretary in an pawl sum dinhmun a tarlang bawk. Chawhma session ah hian nikum chhunga an pawl member mi 186 boral ta te sunna hun an hmang a ni.

MCPA hian Mizoram pumah branch 130 vel an nei a, member mi 7000 vel an awm mek a ni.