MPSC kaltlanga MCS, MFAS leh MIS officer(probationary) lak thar te chuan Administrative Training Institute-a, thla thum leh a chanve zet an training ‘Foundation Course’ chu zirtawpni kalta khan an zo fel. Training kharna programme chu vawiin khan ATI-ah neih a ni a, Department of Personnel & Administrative Reforms enkawltu Minister Pu H. Liansailova’n hmanpuiin, training zo te hi Certificate a hlan a ni.

Pu H. Liansailova chuan MCS, MFAS leh MIS officer (trainees) te’n tih takzeta thla thum chuang an training tha taka an paltlang thei chu a lawmpui thu sawiin khawih hmunah pawh thawk sela, mipui tan an thawk a ni tih hre reng turin a chah a. ATI-in zau taka Service pathum-a officer te hnathawhna a pawimawh tur leh hriat tur thil chi hrang hrang te kim taka funkhawma Foundation Course an buatsaih chu tha tiin ATI-in sawrkar hnathawk te intuaihriamna atan an training module-te an ti changtlun chu tha a tih thu a sawi bawk.

Minister chuan lehkha emaw, file emaw a an thil rel leh ziah te chuan mihring leh mipui a kaihhnawih leh khawih thin avangin officer te chu fimkhur leh hleih nei miah lova dik taka hnathawk turin a chah a. Sawrkar hnathawk te chu politics-a awn lam neih maih lova hna an thawh a tul thu sawiin ruling party tan nilo, Sawrkar tan zawk rinawm takin an thawk tur a ni, a ti. An hnathawhna hmunah theuh hmasawnna hna thawktu tur leh Sawrkar thurawn petu tur an nih dawn avangin rinawmna leh dikna, hleih nei leh awn lam nei lova hna thawk thin turin officer thar te chu a fuih a. Sawrkar tana an thawh chhungin khawiah pawh dah theih an ni tih hriat a tul thu sawiin khawi hmunah pawh awm sela mipui rawngbawlna hna chu tling taka an thawh ngei theih a beisei thu a sawi bawk.

Pi M. Sathiyavathy, Principal Secretary, Department of Personnel & Administrative Reforms pawhin he hunah hian thu a sawi a. Service hrang hrang te tana Training kalphung mumal taka neih a pawimawh thute, Foundation Course hei aia rei, a tlem berah thla ruk tal neih a pawimawh thute leh hetianga Combined Foundation Course hian Service Cadre hrang hrang inkara thawhhona leh inhriatthiam tawmna tha tak a thlen theih thu a sawi a ni.

Programme hi Pu Ashutosh Kumar, IAS, Director ATI chuan kaihruaiin Pu Lalrammawia, Joint Director(Training) leh Course Director ni bawk chuan Foundation Course an kalpui dan chipchiar takin a sawi.

Foundation Course hi MCS officer 12, MFAS officer 4 leh MIS officer 4 ten an zo a ni.