MPSC kaltlanga MCS officer lak tharte chuan Administrative Training Institute, Aizawla thla thum leh a chanve chhung ‘Foundation Course’ training an neih chu vawiin khan an zo fel. He hun hi MPSC Chairman Pu K. Riaccho chuan hmanpuiin, trainee-te hnenah hian certificate a hlan a ni.

Pu K. Riachho chuan officer tharte chu tih tak takna nen thawk a, state dangte tan pawha civil service entawntlak Mizoramin a neih theih nan bei turin a fuih a. Sorkar hnathawk an nih angin khawi hmunah pawh awm se, theihtawp chhuaha thawk zel turin leh, bial harsatna chingfel tur chuan bial mipuite hriatchian a pawimawh thu a sawi bawk. Pu K. Riachho chuan thuneihna hmansual a awl theih chungchang sawiin, dikna leh rinawmna nena fimkhur taka thawk turin trainee-te chu fuihin, an hun kal zel turah duhsakna a hlan nghal a ni.

MCS (Probationer)-te hian June ni2, 2014 atang khan vawiin thleng hian training hi an nei a. Training hi ATI faculty-te bakah Guest Faculty-ten pein, he hun chhung hian Field Trip-te buatsaih a ni bawk. Foundation Course Trainee-te hi mi 15 an ni.

Vawiin training kharna hun hi Pi Sailuti, Joint Director (Trg.) leh Course Director, ATI ni bawk chuan a kaihruai a. Training kalpui dan chipchiar takin a sawi a. Pi K. Lalrinzuali, Joint Secretary, DP&AR leh Pi Irene Zohlimpuii, Deputy Secretary, DP&AR ten he hun hi an hmanpui a ni.