Vawiin khan Aijal Club-ah Eye Donation Fortnight hawnna programme buatsaih a ni a, he hun hi Health Minister Pu Lal Thanzara’n a hmanpui a ni.
Pu Lal Thanzara chuan Mizoram hi India Hmarchhaka Eye Bank nei hmasa ber dawttu niin Sawrkar Damdawiinah phei chuan Hmarchhaka a Eye Bank nei hmasa ber kan ni hi a lawmawm hle a ni, a ti a. Chuvang chuan midangte tana malsawmna ni thei turin leh mitdel ten Pathian siam khawvel mawi tak an hmuh theih nan mit donate nachang hriat leh hemi chungchanga inzirtirna uar lehzual a ngai a ni.
Blood Donation-in Mizoram hming a tih that ang hian eye donation pawh hian Mizoram ti hmingtha se a duhawm tak zet a, kan Kristian-na mil tak midang tana malsawmna ni turin mitinin kan mit donate phal ang u, a ti. Health Department leh sorkar ruahmanna hrang hrangte mipuiin ngaihven nachang an hriat tawk loh thin avangin hamthatna hmuh turte an hmu lo fova, hemi chungchanga inhrilhhriatna te hi uar lehzual a tul thu a sawi.
Health Minsiter chuan Civil Hospital Aizawlah cornea transplant mi 60 hnenah tih tawh a nih thu leh, cornea mamawha in register mi 228 an awm tawh thu a sawi bawk.
Programme hi Dr. K. Ropari, Principal Director, Health & Family Department chuan kaihruaiin Dr. K.L. Remsanga, Deputy Medical Superintendent, Civil Hospital, Aizawl chuan Mizoram Eye Bank hnathawh leh hlawhtlinna te a sawi a ni.
Vawiin programme ah hian mi engmemaw zat, an boral hnua midangte tana an Mit pe chhungte hnenah ngaihhlutna thuziak Pu Lal Thanzara, Pi Zohmingthangi (Pu Lal Thanzara nupui) leh Health & Family Welfare Department a Principal Director leh Director pahnih ten an hlan a ni.
Civil Hospital, Aizawla Eye Bank hi July ni 31, 2008 khan din tan niin tun thleng hian damlai a mit pe phal inziak lut tawh mi 3781 an awm. Eye Bank hian kum 2009 atanga March 2014 thlenga cornea a lak tawh zat chu 238 a ni a, he ta tanga cornea hman zat hi a vaiin 166 a ni.
Mitnaute paw (Cataract) vanga mitdel zai-var sak kumtin mi 2000 Mizoram ah an awm thin. Sikul naupangte mi tha lo kumtin mi 5000 vel hmuhchhuah te hnenah tarmit a thlawn a pek thin an ni. Mit natna chi dang vanga enkawl hi kumtin mi 25000 vel an awm ziah.
India ramah Corneal Blindness nei mi nuai khat singhnih (1,20,000) vel an awm a, hetih lai hian India ram puma cornea lakkhawm zat hi kumkhatah 45,000 atanga 50,000 vel chauh a ni.
