Vawiin khan I&PR Conference Hall-ah Social Audit Director Pu Laltharmawia hovin Social Audit Training neih a ni. He training-ah hian Rural Development hnuaia District leh Block a thawk Addl. Programme Officer (APO) leh District Resource Persons mi 39 an tel a . Pu K.T. Pakhuangte, Deputy Director; Pu K David Lalthanmawia leh Pi R. Lalchhuanmawii, State Resource Persons ten Training an pe a ni.
Social Audit Director Pu Laltharmawia chuan MGNREGA, ni 100 inhlawhna tih a hriat lar hi Ministry of Rural Development, Government of India chuan a ngaih pawimawh thu sawiin, anih tur ang taka hman a ni em tih enfiah theih nan state tinah social audit unit din vek tura Sorkar laipuiin a tih thu a sawi a. Mizoramah pawh ni 100 inhlawhna sum lo kal hi thingtlang khaw kil ber ami te pawhin a hman dan tur dik takin hman a ni em tih an hriat a, thil engkim langtlang vek (transparent) a kalpui a nih theih nan Social Audit Unit hian hna a thawk a ni, a ti.
Ni 100 inhlawhna sum mai ni lo, thingtlang mite hmasawnna tura Rural Development Department hnuaia sum pek te hi scheme nei vek an ni a, a scheme tihlawhtling tur hian thingtlang miten thahnemngaihna an nei tawk lo fova, he mi kawngah hian thingtlang mite fuih sauh sauh turin Pu Laltharmawia chuan Additional Programme Officer-te chu a chah bawk a ni.
Ministry of Rural Development chuan kum khat chhungin Social Audit hi khawtinah vawih hnih tal nei turin a ti a. Chutianga ti tur chuan Social Audit Unit-te chuan kumin kum tir atang khan inbuatsaihna nei tan in, tunah hian kalpui mek zel a ni bawk.
Social Audit-ah hian Social Auditor-te chuan khaw tinah kalin, thla 6 chhunga MGNREGS leh IAY hmanga hnathawhte chu a hmunah an endik ang a. He endikna report hi mipuiin an sawiho leh hnu ah Social Audit Unit-te chuan Social Audit Report te chu lakhawm (compile)-in, nodal department Rural Development Department-in State Assembly a pharh turin an thehlut leh ang. Chumi hnuah State Assembly certified report chu sorkar laipuia Ministry of Rural Development leh Comptroller & Auditor General-ah an thehlut leh a ni dawn a ni.
