District Task Force Committee on Immunization in a rel tawh angin Measles-Rubella (MR) Vaccine pek beihpuithlak chu Serchhip District ah ngawrh taka neih chhunzawm zel ani a, tunah hian Anganwadi Centre leh Health Sub-Centre hrang hrangah pek mek zel a ni.

MR Vaccine pek beihpui thlak kal mek hi zirna in hrang hrangah pek tawh niin, tunah hian naupang school la kal rual lo, Anganwadi-a inziak lut te tan Health Worker, Anganwadi Worker leh ASHA ten Health Sub-Centre leh Anganwadi Centre hrang hrangah te an pe mek a. Beihpui thlak  hi chawlhkar nga chhunga zawh hman tum niin, naupang thla 9 atanga kum 15 chin ten kim taka an lak ngei theih nan khawtlang hruaitute, tlawmngai pawlte, sawrkar department hrang hrangte leh zirna in hrang hrangte bakah nu leh pate thawhpui atan sawm an ni. Kohhran hrang hrangah lehkha chhiarchhuah tur buatsaih anih bakah vaccine pek chhung hian veng chhung Information centre atanga hriattirna puan chhuah thin niin, khawtinin Vaccine Supervisor an nei kim bawk a ni.

India ramah MR Vaccine pek beihpui thlak mek niin tun dinhmunah State 15-a naupang thla 9 leh kum 15 inkar, mi vaibelchhe 8 pek tawh an ni a. Mizoramah chuan ni 16, April 2018 atanga beihpuithlak hi kalpui tan ani a, tun kar chhung hian Serchhip District chhungah vaccine hi pek zawh hman beisei a ni.

Attachment

  • Loading attachment...