Vawiin khan Champhai North bialtu MLA Pu TT Zothansanga chuan a bial chhunga School pahnih Govt. Champhai High School, Vengthlang North leh Govt GM Higher Secondary School, Vengsang-a mite chu a tlawh a. He hunah hian School zirtirtute leh naupangte kawmna hun neiin an dinhmun tlangpui a enpui a ni. Champhai North bialtu MLA hi Pu C. Hualrikhuma, Dy. DPC RMSA leh Dr Lallawmkima, DIPRO Champhaite chuan an tawiawm a ni.

Pu TT Zothansanga chuan zirlai naupangte chu tum mumal tak nei  tur leh inthununna, taihmakna leh beih hram hram peihna thinlung pu turin  a chah a. Mi  tam tak zinga hlawhtlinna chang tlemte an awm thin thu sawiin, chung zinga tel ve thei tur chuan nu leh pa, zirtirtu leh Pathian thuawih angai a ni, a ti a.   Result tha tak nei thei tur chuan zirlai thiam bel angai a, social media hman dan chin tawk thiam pawh angai a ni, a ti a. Mi taima, bei fat fat thin leh teirei peih te chu hlawhtlinna tlanga ding thinte an nih thu sawiin, a bial chhunga Mizoram Board Exam-a top ten a lang phate chu lawmman atan cheng singnga zel a pek thin tur thu a sawi bawk a ni. Thiam thil neih dem dum aiin kalna lama thiam filawr nih a tul thu leh bengvar tum luat ai chuan zirlai lama tanlak angaih zawk thu a sawi a. Champhai tlang chu zirna lama hmun dangte elpha ve tura tan lak a ngaih thu leh Nu leh pa te pawhin hemi lama fate kan hruai harh leh chu thil pawimawh tak a ni, a ti a. National level Exam leh Entrance test-ah kan elpui hnam dangte kan tluk theih nan a bulthum atanga hmalak angaih thu leh  chumi tur chuan tun hun zel hi a pawimawh thu a sawi a. Mahni awmna hmunah chauh hna zawng lo a, state pawn leh ram pawn tleng pawha chhuah hrehlo turin  a chah a. Nakin lawka  Champhai innghahna tur zirlai naupangte chu nawmsak hmasak lova, hrehawm tuar huam tura chahin, thiam theih ringawt aiin teirei peih a that zawk thu a sawi a. Zirlai naupangte chu ruihhlo leh a kaihhnawih laka inthiar fihlim tur leh  tihtur hriat loh pawhin tih loh tur tal hrethiam turin a chah a. Role model school  ni thei tur leh result duhawm tak nei thei tura tan la thar leh turin zirtirtu leh zirlai naupangte chu a chah nghal bawk a ni.

Pu C.Hualrikhuma, Dy.DPC, RMSA Champhai  leh Dr Lallawmkima, DIPRO Champhaite pawhin  School tlawhna hmunahte hian zirlaite fuihna thu an sawi ve bawk a ni.

Champhai North bialtu MLA-in Govt Champhai High School, Vengthlang North a tlawhna hunah hian Headmaster Pu Vanlalsawma, a thawhpuite leh Vengthlang North khawtlang hruaituten MLA hi an lo dawngsawng a. Khawtlang aiawhin Pu R. Lalfakawma, VCP Vengthlang North pawhin thu a sawi bawk a. Govt GM Higher Secondary School a tlawh tum hian Principal Pu K.Pazawna leh a thawhpuiten an lo dawngsawng a. School thuneitute hian school chanchin leh harsatna tlangpuite an lo thlen a. Bialtu MLA chuan lo enzui sak a tum thu a sawi a ni.

School a thawktu leh khawtlang hruaitute chuan bialtu MLA thahnemngaihna leh tawiawmnaah  lawmthu an sawi a ni.