Vawiin chawhma khan Assembly Annex Conference Hall-ah Mizoram sawrkara Secretary leh Head Of Department te pualin  Awareness Proramme on Solar Power Policy of Mizoram & Grid Connected Solar Rooftop Systems neih a ni a. He hun hi Power & Electricity Minister Pu R.Lalzirliana'n khuallian niin a hmanpui.

Power & Electricity Minister Pu R. Lalzirliana chuan Mizoramah luitui chakna hmangin lui engemaw zahah kawlphetha sawrkar hmalakna in siam ni mahse Mizoram in kawlphetha kham khawp a la hmuh loh thu a sawi a. "Sawrkarin kawlphetha intodelh ni turin theihtawp a chhuah mekinTlawva luiah leh Kawlbemah te hydel project siam mek a ni a. Tuiriniah pawh hydel project siam turin sawrkarin chak takin hma a la mek bawk a ni. Heng kan hmalak mekna leh Hydel power unit 8 state sawrkar anga kan enkawl mek atanga kawlphetha kan siam theih zat hi ruahtui leh tuihna tam danah a innghah leh zel a vangin nizung chakna hmanga kawlphetha a tam thei ang ber siam chhuah hi sawrkarin  a dah pawimawh em em a ni", a ti. Power Minister chuan Nizung chakna senga kawlphetha siamchhuah chu Mizoram tan thil thar a ni lo a. Hmalakna tam tak a lo awm tawh thin nain chungte chu department te leh company rintlaklo te thawhhona avangin sum tam tak khawhralnaah a chang a. Tunah pawh sawrkarin Mizoram Solar Power Policy 2017 hi tihpuitlin duh a takzet a . A hlawhtinna turin  department ten Nodal Agency atana sawrkarin a thlan, Zoram Energy Development Agency ( ZEDA) an thawhpui ngei a pawimawh hle dawn a ni a ti. Power Minister chuan, "Mizoram Sawrkar Solar Power Policy chu Budgetary Support nei hman turin Budget Session a ngaihtuah hman ni lo mahse sawrkar laipui leh state sawrkar policy a nih avangin a dah pawimawh a. He policy tihpuitlinna atana hmalatu Department te chu sawrkarin a theih dan kawngte dapin  tanpui a tum a ni", a ti.

Mizoram sawrkar Solar Power Policy 2017 leh Grid Connected Solar Rooftop Systems chungchang sawifiahna hun ZEDA Director Pu David Ramnunsanga'n a hmang a. Mizoram sawrkar Solar Policy chuan nizung chakna hmanga kawlphetha siamchhuah kawnga a hmalaknaah te Sawrkar laipui hnuaia hmalakna  Jawaharlal Nehru National Solar Mission(JNNSM) leh  Deendayal Upadhyaya Gram Jyotin Yojana (DDUGJY) atanga tanpuina sum awm thei te hman tangkai a tum mek a ni.

Mizoram Sawrkar Solar Power Policy thiltum lian deuh deuh te chu nizung chakna hmanga a tam thei ang ber kawlphetha siam leh hman intihhmuh te, Grid Connected Solar leh Off-Grid Solar system hman intihhmuh te, Nizung chakna hmanga kawlphetha siam hmanga sumdawnna intihhmuh leh power siam sumdawnna atan hman intihhmuh te leh sawrkar department office zawng zawngte chu lohtheih lohin an remchandan/a theihna chen chenah  anga an office chunga rooftop solar power unit siamtir te a ni.

National Institute of Solar Energy (NISE) chhutdan chuan Mizoramah Solar Energy MWp 9090 a siam theih beisei a ni a.  Kum 2022 a lo thlen huna Mizoram in Solar Energy siam tur a tana tuk sak chu  MWp 80 a ni a; hei hian rooftop system  atanga siam te pawh a huam ang. Tun dinhmunah Mizoram sawrkar chuan Solar Power Rooftop system kWp 3555 chu ZEDA kal tlanga pek chhuah theih in a peihfel tawh a. Heng zinga kWp 555 chu sawrkar office building te  atan a ni a, kWp 3000 chu mimal anga lei theih a ni thung a ni. 

Awareness Proramme on Solar Power Policy of Mizoram & Grid Connected Solar Rooftop Systems hi P & E Secretary Pu . H.Lalengmawia'n a kaihruaia. 

Sawihona pawh hman a nih hnuin lawmthusawina in P&E E -in-C Pu Lalramlianan Programme hi a khar a ni.

P & E  in a  tarlan dan chuan Mizoram Sawrkar hnuaia  Power Unit 8 ten tun dinhmuna kawlphetha an siamchhuah zat chu MW 29.5 a ni a. Serlui Hydel Power Project bikin kawlphetha a siam zat chu MW 8 a ni a. Mizoram sawrkar in thlatin pawnlam atanga  kawlphetha   leinan Rs 25 crore atanga Rs 28 Crore a hmang deuh ziah anga chhut a ni.