Nimin khan Biate leh Khawbung inkar Tuipui Lui kama Khawbung PHE Pump House ah Tuipui tlawhchhan joint YMA ten Tuipui luia Sangha humhalh tha Branch YMA te hnena lawmman hlanna inkhawm an buatsaih a. Pi Vanlalawmpuii Chawngthu, Minister of State for Fisheries, etc., chuan khuallian niin a telpui.

He lawmman semna leh hmalak dan report pekna inkhawmah hian Pi Vanlalawmpuii Chawngthu chuan, Tuipui lui ri tu Br. YMA intelkhawm khaw 13 ten tangruala Tuipui humhalh nachang an hria chu lawmawm a tih thu leh entawn tlak a tih thu a sawi a. Sawrkar anga hmalakna hrang hrang bakah YMA member a nihna atang pawhin ramngaw leh nungchate humhalh kawngah thahnem a ngaih thin thu sawiin, nasa zawka bei sauh sauh turin a ngen a ni. An hmalaknaah tanpui theihna a nei anih phawt chuan tanpui turin a inralring reng tih sawiin Minister hian, Sangha chi chhuah an duhna pawh tihpuitlin sak a tum thu a hrilh a ni. Kan ramah thing leh maute kan tihchereu nasat avangin kan lui tuite a kam chak tawh hle a, tuihna humhalhna kawnga chak zawka hmalak chu kan lui sanghate humhalhna atan a pawimawh thu te, ramngaw leh nungcha humhalh kawnga YMA ten nasa taka sawrkar an thawhpui thin vanga lawmawm a tih thute a sawi bawk. Thu a sawi zawh hian Minister hian Tuipui tlawhchhan Joint YMA member Branch, kum kaltaa Sangha fuan venghim kawnga thawk tha Branch te hnenah lawmman a hlan nghal a. Lawmman hi Leng Br. YMA leh Khuangleng Br. YMA in dawngin, Bungzung Br. YMA hnenah Special Prize a hlan bawk a, Tuipui lei hnuaia Sangha humhalh mek chu chaw pein he lai Sanghate tan hian Sangha chaw bag khat a pe nghe nghe a ni.

Tuipui tlawhchhan Joint YMA te hi Branch 13 intelkhawm niin, Tuipui luia nungchate venhim kawnga hnathawk ho an ni a. He luia Sangha fuan laiin lui sangha beih an khap a. Dan phal baka Sangha man chi hrim hrim kumtluana khapin Lenkhang No. 25 aia sina man an khap bawk a. Tuipui lei (Bridge) hnaih km chanve vela thui chu kumtluanin khauh takin an humhalh bawk a ni.

Nimina lui vengthate lawmman hlanna inkhawm hi an pawl Chairman Pu. R. Lalremkunga'n a kaihruai a ni.

Nimin vek hian Pi Vanlalawmpuii Chawngthu hian Biate Water Supply Scheme - Pumping, 10% Lump- sum sum Rs. 1364. 67 lakh senga hnathawh mek a tlawhnghal bawk a. He tuilak hi Mizorama khawpui fai ber, Biate mipuiten mipakhatin nitin tui thianghlim litre 135 an dawn theihna tur ruahmanna niin First class contractor Pu. H. Sanga, Aizawl Chanmary in a thawk a. Hnathawktute a tlawhnaah hian Minister chuan hnate chu rang taka an zawh theih nana theihtawp chhuah turin a hrilh a. Harsatna an neia, tanpui theihna a nei a nih chuan an tan a inhawng reng tih a hrilh a ni.

Minister in Biate Water Supply Scheme Pumping a tlawh hi Pu V. Lalvuana, JE, PHE Lungdar Sub Division leh hnathawktuten an lo dawngsawng a. Tunah hian Tuipui atanga pump house, pump house atanga Biate tlang thlenga pipe fit zawh tawh niin Power Generator pawh a thleng tawha, a pump na khawl hi tunah la nghah mek a ni thung.