Vawiin khan DC Conference Hall Mamitah Pi Lalbiaksangi District Task Force on Immunization (DTFI) Chairman / District Bawrhsap hovin April Ni 16 a Measles Rubbella Vaccination Campaign  hawnna kalpui dan tur relin an thukhawm a. Pu Lalrinmawia Ralte, Hachhek Bialtu MLA, Political Adviser to CM chu khuallian atan leh he Campaign Programme hawngtu atan hman nise tih a ni.

Measles Rubbella Vaccination Campaign Programme hi Hmunsam Public School-ah zinglam dar 9:30 atanga tan tur a ni a. Mamit District chhunga naupang thla 9 atang kum 15 hnuailam mi 25612 target niin naupang chiu-na hmun tur 293 ruahman a ni a. April Ni 16 atanga karhnih chhung bik hi School naupangte chiu hun tura ruahman niin karhnih hnulam atang hian School kal lo naupangte chiu-na hun atana ruahman a ni.

School naupang bikte chiu-na tur hian School 186 ruahman niin School kal lo naupangte chiu-na tur hmun 90-ah ruahman a ni a. Hei bakah hian Special Team te’n hmun 6-ah naupangte chiu-na hmun an buatsaih dawn bakah Mamit District chhunga Damdawiin hrang hrang 7-ah vaccine lak theih tura ruahman a ni bawk.

Measles Rubbella Vaccination la tawh te chu Vaccination Card pek theuh an ni dawn a. Naupang kum bithliah he vaccine la thei turte chu  DTFI chuan an fate laktir ngei turin an nu leh pate a sawm a ni.

Mamit District chhunga he Vaccination Campaign kalzelah Medical Staff - te inbuatsaihna a tha a. Vaccinators 86 leh Accredited Social Health Activist (ASHA) leh Anganwadi Workers (AWW) 405 bakah Supervisor 51 te chu Training pek tawh niin eng emaw harsatna lo thlen thulhah pawh Mamit Medical Staff te inbuatsaihna hi a tha thawkhat hle a ni.

Meeting-ah hian MR Vaccine vials mamawh zat leh a phurh kual dan tur ruahmannate Dr. TC Hmingthangi, District Immunization Officer & Member Secretary, DTFI chuan report pein DTFI Committee Members te an tel tha hle a ni.