Sawrkar laipui programme pawimawh tak naupang thla 9 atanga kum 15 inkarte hnena Measles (Sentut) leh Rubella (German Sentut) hri laka invenna tur MR Vaccination  programme chu District Bawrhsap Pu Vanlalngaihsaka chuan a hawng. Hawnna inkhawm Govt Primary School-I, Kahrawt, Champhaia neihah hian Health Department, Social Welfare Department leh Education Department lama hotute an tel a ni. 

 District Bawrhsap Pu Vanlalngaihsaka chuan sawrkar laipui hmalakna hnuaia MR Vaccination campaign India rama naupang thla 9 atanga kum 15 inkarte hmaih nei miahlo pek a ni tur chu lawmawm a tih thu a sawi a. Champhai District chhunga vaccine la thei tur naupang 40,511 ten he vaccine hi an lak vek theihna turin line department-te leh mipuite tan rual angai tak meuh a ni, a ti a. A thlawna Sawrkar hmalakna hmanga vaccine pek ani tur chu natna do kawngah leh hriselna vawn kawnga pawimawh tak a nih avangin mitinte chu he MR Vaccination campaign hi phur taka tawiawm zel turin a chah a ni. 

Hawnna hun hu Dr Vanlalnghaki, CMO, Champhai District chuan kaihruaiin kalkhawmte lawmna thu a sawi a. MR Vaccination programme chu national programme pawimawh tak a nih avangin a hlawhtlin theihna turin inpuahchahna nasa taka kalpui a ni, a ti a. District Task Force for Immunization Committee-te din anih thu leh MR Vaccination Campaign District Core Committee, line department hrang hrangte huam tel pawh din niin,  meeting, training leh workshop-te kalpui thin a nih thu  a sawi a. Microplanning felfai tak leh review meeting mumal tak te neih thin a ni, a ti a. Measles leh Rubella te avanga nghawng thalo awm theite sawi zauin hemi avanga nunna chan anih dan te a tarlang a. Vaccination kalpuina tura inpuahchahnate WHO lam aiawhin an enpui thin thu sawiin naupang vaccine dawng thei tur zawng zawngin hmaih awm lova vaccine an lak vek theihna turin line department, khawtlang hruaitute chu thawhhopuiah a sawm nghal bawk a ni. 

Vaccine pakhat hmanga natna pahnih hneh theihna  Vaccine hi District chhunga naupang thla 9 atanga kum 15 inkar mi 40,511 hnena pek tum a ni a. Measles Rubella (MR) Vaccine hi 30 chhunga District chhunga naupang thla 9 atanga kum 15 inkar zawng zawngte pek vek tur a ruahman a ni a. A tir hapta hnih chhung chu zirna in zawng zawngah pek tur niin, a dawt hapta hnih chhung chu vantlang/khawtlangah kalpui a ni ang a. A tawp hapta khatah chuan pek hmaih palh awmthei venthawn nan thual nawnna Sweeping phase neih tur a ni ang. 

Vawiin vaccination pekna hi room thumah then niin vaccination pek hmaa awmkhawmna (Pre- Vaccination Room), Vaccine pekna ( Vaccination Room) leh Vaccine la zo tawhte awm lailawka, endik an nihna tur hmun ( Post-Vaccination Room) te a ni. 

Measles (Sentut) natna hian Pneumonia, kawthalo, hritlang, khawsik leh natna hlauhawm dangte a thlen thei a. Rubella (German Sentut) natna hian ruhna, thalbe vung, khawsik, naupai laiin a vei chuan nauchhiat, nausenah- mitdelna, bengngawng, rilru kimlo leh lung thalote a tlen thei bawk a ni. Hri danna hi a bi kim ngeiin naupangte lak tir thin tur a ni. MR Vaccine chungchanga hriatchian leh zual duh tan Health Department a thawktute, Health Worker, ASHA leh Anganwadi thaktute zawhfiah theih reng a ni. 

Measles natna vang hian khawvel pumah mi 1,34,200 vel an thi a, heng zinga 49,200 chu India rama mite an ni. Rubella vang hian khawvelah mi nuai khat vel thiin heng zinga mi singli vel chu India mite an ni. MR Vaccination hi India ram state 15 chhunga a naupang vaibelchhe 41 vel pek tawh niin naupang vaibelchhe 8 te chu pek leh vek tuma tanlak mek a ni.