Vawiin chawhma khan DC Conference Hall, Keifangtlang, Champhaiah Live Animal Market, Champhai Ruantlanga sak dan tur chungchunga inrawnkhawmna  hun District  Bawrhsap Pu Vanlalngaihsaka hova neih  a ni. AH& Vety Department hnuaia sak tur  Ran endikna leh zawrhna tur hmun sakna tur hi cheng nuai 260.839 senna tur a ni a. NABARD in cheng nuai 246.493 a tum anga, Mizoram sawrkarin cheng nuai 14.346 a tum ve thung dawn a ni. He project hi kum 2017-2019 chhunga thawh tura ruahman a ni.

Meeting chuan Mizoram sawrkar hmalaknaa Champhai hmun ngeia Live Animal Market din a ni tur chu lawmawm a tih thu a sawi a. Project chu District dinhmun leh awm dante ena a taka hman a nih ngei theih nan hmalak zel tha tih a ni a.  Ennawn ngai leh her danglam ngaite uluk taka zirchian leh hnuah siam that nise tih a ni a. Mangement leh monitoring-te pawh tha taka tih nise, tiin meeting chuan a rel a. Meeting chuan India ram hmun danga awm ngailo project tha tak chu anihna ang taka tihhlawhtlin ngei anih theihna turin khawtlang hruaitu, mipui leh line department tawiawmna a ngen bawk a ni.

Champhai hi International Border area anih avangin ran lut leh chhuakte uluk taka endik anih a ran hrisel leh pangaite chauhte zawrh anih hi natna ven kawngah a pawimawh hle a ni. Heng bakah hian sawrkar phalloh ran lakluh dan a ni thei dawn a, sawrkarah chhiah  felfai taka pek a ni thei dawn bawk a ni. Ruahman dan chuan he hmunah hian ran hriselna  endik thin a ni anga, a hriselte chauh zawrh chhuah tura soundness certificate pek thin a ni dawn a ni. Ran hriselte chu a hmunah hian zawrh niin lei chhuah theih a ni dawn bawk a ni. Ran thite halralna tur leh damlote test zung zungna tur laboratory-te pawh bun tum a ni bawk. Ran te thlithlaina Quarantine, damlo dah hranna Isolation room leh thil dang te pawh Vety Doctor enkawlna hnuaiah dah tum a ni bawk a ni.

Meeting-ah hian Line Department aiawhte leh khawtlang hruaitute telin zau takin sawihona hun neih a ni a. A hma thei ang bera inrawnkhawmna meeting neih leh rel a ni.