Ramchhung hmun dangte ang bawkin Mizoramah pawh state pum huapin ‘Measles-Rubella Vaccination Campaign’ thlak tan a ni a, vawiin khan Health Minister Pu Lal Thanzara’n he Campaign hi Govt Mizo High School Auditorium-ah a hawng.
Measles-Rubella Vaccination Campaign (MRVC) hawnna inkhawm National Health Mission Director Dr.Lalrozama kaihhruaiah Khuallian Health Minister Pu Lal Thanzara chuan he Campaign-in a tum ber chu naupag thla 9 pumhlum atanga kum 15 hnuailam zawng zawngte MR Vaccine pek vek a ni a; kum 2020-ah chuan Sentut umbo vek a, Rubella natna leh a kaihhnawih Congenital Rubella Syndrome (CRS) hi khuahkhirh tlatin, Sentut vanga nau thi leh Rubella natna vanga nau piangsual an awm tawh lo hi a ni, a ti a. Mizoramah hian CRS case 1 hriat chian a ni tawh a, thla hmasa lawk khan Rubella positive naupang 2 hriat a ni leh bawk a, heng lo pawh hi awm tura ngaih a ni a, chuvangin naupang rualbanlo tam tak enkawl mekte pawh hi Rubella vang a ni lovang tih a sawi theih loh a ti bawk. A hmaa Measles, MR emaw MMR vaccine lo la tawhte tan pawh he campaign chhung hian lak nawn leh vek tur a ni a, naupang tan a hlauhawm lo a ni tiin Minister chuan heng naupangho hi Sentut lh Rubella kai awlsam ber an ni a, anni rual hian vaccine an lak vek chuan Mizoramh hia Sentut vanga nau thi leh Rubella vanga nau piangsual hi an awm tawh dawn lo a ni, a ti. Hetiang khawpa chhungkua leh khawtlang tana hriselna kawnga harsatna rapthlak tak thlen theitu natna hi MR vaccine lak avanga fihlim theih, hlauhawm bawk si lo, sum sen ngai lo a sorkarin a thlawn liau liau a kan kawtchhuah maia lak theiha min han chhawp chhuah sak hi a vanneihthlak hle a ni tiin Minister chuan kan tu leh fate lo lak tir hi mitinin kan tih makmawh a ni a ti.
Vawiin Campaign hawnnaa High School naupang kalkhawmte chu an zirnaah duhsakna hlanin Khuallian Pu Lal Thanzara chuan ruihtheihthil leh ruihlo, zuk leh hmuam chi hrang hrang lakah fihlim turin a chah a, HIV+ case tam tak an awm tawh avangin an nun uluk a pawimawh hle a ni tih a hrilh bawk.
State Immunisation Officer Dr.Lalzawmi pawhin thu sawiin MRV Campaign chhung hian Mizoramah naupang 3,75,000 vaccine pek tum a ni, a ti a. Vaccine pek hmaih palh an lo awm a nih pawhin chung chu zawnchhuah leh an ni ang a, amaherawhchu chung naupang te chu an inah vaccine pe tura pan tawh lovin vaccine pek theihna hmun an pan a ngai tawh thung dawn a ni, a ti bawk.
India leh WHO-SEARO (South East Asia Regional Office) ram hrang hrang tangrual te chuan, September 2013 khan kum 2020-ah chuan Sentut umbo leh, Rubella leh a kaihhnawih Congenital Rubella Syndrome (CRS) khuahkhirh tlat an tum thu an lo puang tawh a. Sorkar laipui pawhin nasa taka hma la zuiin, kum 2020-ah chuan Measles (sentut) hi umbo a tum a, hemi bakah hian Rubella leh Congenital Syndrome (CRS) te hi khuahkhirh tlat a tum a. Hemi tih hlawhtlinna atan vawiina Measels-Rubella Vaccination Campaign hi Mizoramah pawh tan a ni ta a. Saiha District-ah erawh chuan VC inthlanna nena intihbuai dawn avangin ni 16.4.2018 (Thawhtanni) khan Campaign hi hman a ni tawh a ni.
