Vawiin khan Gov't M/S - I Mamitah Measles Rubella Vaccination Campaign hawnna neih a ni a. Pi Lalbiaksangi Mamit District Bawrhsap/ District Task Force on Immunization Chairman ni bawk chuan khuallian niin Measles Rubella Vaccination Campaign hi a hawng nghal bawk.

Khuallian chuan thu sawiin Sorkar hmalakna zarah Vaccine man to tak a thlawna Mamit District naupangte'n an dawng thei tur chu lawmawm a tih thu sawiin naupang thla 9 atanga kum 15 hnuailamte chu Vaccination Campaign neih chhung hian Vaccine la vek turin a sawm a. Mithiamte chhut danin kumtin India ramah mi 4900 Measles Rubella natna avang hian an boral ziah anga chhut a ni a. Heng bakah hian he natna hian naupang piansualna hrang hrang a thlen thei a, he natna hi tihdam theih a nih loh avangin a invenna Vaccine hi lak ngei ngei tur a ni a ti.

Khuallian chuan he Vaccine hi a hlauhawm loh a ni tiin tun hnai maiah pawh kan thenawm State-ah te pawh naupang vaibelchhe 3 ngawt he Vaccine hi pek tawh niin naupangte'n engmah harsatna an tawk lova, chuvangin he Vaccine hi mithiamte'n uluk taka an enchhin hnuah a him tawk a ni tih finfiah tawh a ni a ti bawk.

MRVC hi vawiin atangin Mizoram pum huapa neih tur a ni a. Kan target atangin 95% kan phak ngei ngei a ngai a, Kan phak lo a nih chuan a bul atanga tan that leh tur a nih avangin nu leh pate pawh an fate Vaccine laktir ngei tur leh ngaipawimawh turin ngen an ni. He Vaccine hi eng sakhua nen mah inkungkaih a ni lova, hri danna Vaccine a ni mai a, eng thil hlauhawm mah a awm lo a ni. Tupawh Mamit District mipuite Sakhuana kawnga rin dan leh ngaihdan tha lo pu lo tura ngen kan ni.

He hunah hian Pu Lalsailova, District Programme Co-ordinator, SSA Mission, Mamit District leh H.Lalremmawii Ambassador, MRVC pawhin thusawina hun an nei a ni.

Measles Rubella Vaccination Campaign hawnna hun hi Dr. Zothankhuma Chhakchhuak, Chief Medical Officer -in kaihruaiin Dr. TC Hmingthangi, District Immunization Officer, Mamit District-in kalkhawmte hnena lawmthu sawina hun a nei a ni.

He Vaccination Campaign hawnna hun hi Dr.Archana Gayel, WHO Surveillance Medical Officer (SMO) leh Dr.Praveen Aivalli, Unicef Consultant te'n an telpui a ni.