2487/2023-2024

Aizawl, the 25th October, 2023: General Election to Mizoram Legislative Assembly, 2023 neih tura inpuahchahna kalzelah vawiin chhun dar 12 khan Chief Electoral Office, Mizoram buatsaihin media-te tan ICT Conference Hall, Top Floor-ah 'One Day Sensitization Workshop' buatsaih a ni.

He hun kaihruaitu Addl. Chief Electoral Officer Pu H.Lianzela chuan kalkhawmte lawmna thu sawiin, inthlan kaihhnawih hriat tur pawimawhte inzirtirna 'One Day Sensitization Workshop' buatsaihah media mi leh sa thahnem tak an tel thei chu lawmawm a tih thu a sawi a. Election Commission of India-in media a ngaihpawimawh thu leh ECI hnuaiah chak taka media lam kaihhnawih kalpui a nih thu a sawi a. Media platform hrang hrang kaltlanga voter awareness kalpui chu ECI duhdan a nih thu sawiin, hei hi chanchinbumite tel lo chuan a harsa hle a ni tiin, kalkhawmte chu vote thlak thatna State, inthlanna muanawm, felfai leh dik siam tura theihtawp chhuahpuiah a sawm a ni.

Democracy ram inghahna lungphum 4-na media-te chu tan lam nei lo tur leh, thu dik leh finfiahte chauh puangzar thin turin a chah a. Inthlan kaihhnawih mipui zirtirna tam zawk pe tura sawmin, October ni 26 atanga November ni 6, 2023 thlengin mipui zirtir kawnga nitin chhuak Chanchinbute inelna CEO Office-in a buatsaih dawn thu a sawi a. November ni 6 leh ni 7, 2023 ahte Editorial kaltlangin politics rawng kai lo vote thlak tura mipui zirtirna thailang turin a ngen bawk a. Vote tla zat tisang tura State pawn leh hmun danga awmte'n vote thlak an ngaihpawimawh deuh deuh theih nan leh vote thlak ni chu hlawh kiam chuang lova chawlh, ‘Paid Holiday’ ah Sawrkarin a puan avangin Sawrkar hnathawk mai bakah, awmpui nei leh an hnuaia chhawr neite’n an ngaihpawimawh theih nana tanlakpuiah a sawm nghal bawk.

He hunah hian Pu Henry C.Lalrawnkima, Deputy CEO hnen atangin inhmelhriattirna leh report ngaihthlak a ni a. Resource person 4; Dr. Lallawmkima, IPRO (Media/Social-media related issues), Pu Vanlalringa, Sr. Informatics Officer (cVIGIL/KYC & Helpline apps), Pi H.Vanlalruatfeli, Programmer, CEO Office (Suvidha & Candidate apps) leh Pu Zonun Sanga, Addl. SP, CID Crime (Offences related to media during elections) te'n zirtirna an pe a. Pi Mina Zoliani Joute, Dy. Director, I&PR Department-in lawmthu sawiin hun hman a khar a ni.

Hemi hnu hian Chief Electoral Officer (CEO), Pu Madhup Vyas, IAS chuan inthlan chungchanga inpuahchahnate media-te hmaah sawifiahin Press Conference a neih chhunzawm nghal a ni.