Vawiin chawhma dar 10:30 Am khan A&C Auditorium, Venglai Lungleiah, Art & Culture Department, Lunglei leh Mizo Academy of Letters, Jt. Hqrs. Lunglei te tangkawp a buatsaih Meet the Authors-Elders(Hranghluite Kawmna) hun hman a ni a, Pi C. Lalremruati, IPRO, Lunglei chuan khuallian niin he hun hi a hmanpui a, Resource Person te Rev. Dr. Raltawnga, Pu C. Hrangdula leh  Pu C. Laizawna te kawmna hun hlawk tak hman a ni.

He hun hi Pu K. Darchhawna, Vice President, MAL Lunglei, kaihhruaiin khuallian Pi C. Lalremruati chuan,  Art & Culture Department leh  Mizo Academy of Letters, Jt. Hqrs. Lunglei tangkawp ten Meet the Authors-Elders an buatsaih thin hi thil lawmawm tak a ni a, kan ziakmi, mithiam tak tak te mai bakah kum lama upa zawk, mi bik leh mi rawn tlak, chawimawi phu tak takte kawmna hun an lo hmang thin hi ropui ati a. Vawiin a an kawm turte tan pawh hetiang platform buatsaih sak an ni hi inchawimawina ropui tak a nih rualin an thu leh hla, an kamchhuak ngei ngaithla thei tura kal khawmte chu an vannei lehzual em em a ni a ti. Kan thalai te leh mi dang tam takte pawh a ni ang, Mizotawng kan ziah dan chungchangah hian tan kan laka kan fimkhur thar a pawimawh thu sawiin, ziak zawm leh zawm loh tur kan hriat loh mai bakah, Social Media hrang hrang kan hman nasat avangin, short form/short cut kan uar em em a, kum lama upa zawk leh rual u tam tak chuan tunlai thalaite thuziak leh message inthawn thin ang te hi chu chhiar thiam har tak leh awmze nei lo a ni fo thin a ni a ti..Mizotawng ziak dan dik  inzirtir kawngah pawh tan kan thar a ngaih thu a sawi. Ziak mite pawhin thuziak kawngah tan an lak thar a ngai a, Lunglei lamah pawh ziakmi tha tak tak leh thiam tak tak kan nei teuh a, lehkhabu ziak leh publish lamah pawh tan lak thar a pawimawh thu leh lehkhabu ziak hi kan mellung pawimawh tak a ni a, kan thih hnuah pawh kan thuziak chu a thi ve mai mai thei tawh lova, he khawvel a awm chhung chuan kan tu leh fa, kan thlah te thleng pawha kan ro hnuchhiah theih thil hlu tak a ni a, helam kawngah pawh tan ila thar zel ang u a ti bawk.

Hranghlui te kawmna hun hi Pu TC. Jonunsanga, Secretary, MAL Lunglei chuan kaihruaiin Rev. Dr. Raltawnga kawmna hun hi Pu Zonunmawia’n a hmang a, Pu C. Hrangdula kawmna hun hi Pu C. Lalhruaitluanga’n hmangin, Pu C. Laizawna kawmna hun hi Pi Lalsangpuii’n a hmang thung.

He hunah hian Rev Dr. CL. Hminga, Patron, MAL Lunglei chuan Art & Culture Deptt. Lunglei in kum 1998-2017 chhunga Seminar hrang hrang an lo buatsaih tawha thuziak tha tak tak an dahkhawmna lehkhabu ro tling tak Collected Seminar Papers chu a tlangzarh ani. Pu Gen Khan Do, SRO & Organising Chairman chuan lawmthu sawina hun a hmang a ni.