Vawiin khan Tourism Department, Ministry of Tribal Affairs leh NEC tangkawp buatsaihin Mizote zalenna sual laia nunna thapa Arakan atanga China thleng kea kal hnam sipaite chawimawina leh ram leh hnam tana hma an lo laknate pholanna - 'Meet the Heroes: Peace Pays' inkhawmpui chu Vanapa Hall-ah buatsaih a ni. He hunah hian Chief Minister Pu Zoramthanga chu khuallian niin Deputy Chief Minister Pu Tawnluia chu khualzahawm a ni a. Speaker, Deputy Speaker, Minister leh MLA engemawzah an tel a ni.

He hunah hian zalenna suala China-a kalte - hmahruaia kawng lo sattu mi 4 te bakah Mizo Hnam Sipai China a kea kal la dam mi 77 leh mualliam tawh mi 61 te chu chawimawina hlan a ni a. China ah hian thawh hnihin sipaite hi ke a kalin training te neiin ralthuam te an han la a, ke vekin an lo haw a ni.

Chief Minister chuan a chinchhuakin rammut laia zalenna suala hma lo lak tawh dante leh remna leh muanna hlutzia a sawi a. Vawiina programme siam chuan thangtharten Mizo history a thilthleng pawimawh tak an hriatzau theihna ni se tiin ram hmangaihna kawnga Mizo mipuite an harhtharna ni lo ni se a ti a ni.

Deputy Chief Minister Pu Tawnluia thuchah video kaltlanga tihchhuah, hetah hian hnam zalenna suala rammu zing a Mizo Hnam Sipaite chawimawina leh hriatrengna programme siam a ni chu lawmawm a tih thu leh, zalenna atana an inpekna hlutzia leh sawrkar pawhin a ngaihthah miahloh thu a sawi a ni.

Hun kaihruaitu Tourism Minister Pu Robert Romawia Royte chuan thalai tam tak ten hnam mi huaisen te an hmelhriat a, an tum ruhna leh an huaisenzia te hi hrechhuak thar leh turin kalkhawmte a sawm a ni.

Vawiin programme-ah hian lehkhabu pahnih – “The Valorous Walk to China” tih leh “Expedition to China” tih chu tlangzarh nghal a ni a. Heng lehkhabu te hi Hnam Sipai te China kal behchhana an thil tawn hrang hrangte tarlanna a ni. Vawiinah hian CM hlui Pu Laldenga, CM Pu Zoramthanga, Pu Lalhmingthanga leh Pu Lalthangliana Philip te hnenah China kal tura sulsua hma an lo lawk tawhna avangin chawimawina pek an ni bawk. Vawiin programme-ah hian Delegation aiawhin Pu Thangruma leh Contingent aiawhin Pu Lalhmingthanga te hnen atangin thusawi ngaihthlak a ni bawk a. Pi Esther Lal Ruatkimi, Commissioner & Secretary, Tourism chuan lawmthu sawiin hun a khar a ni.