Vawiin July 9, 2012 hian Pi L. Tochhong, IAS, Chief Registrar of Birth & Death, leh Additional Chief Secretary office chamber ah Meeting of Inter Departmental Coordination Committee neih a ni a. He committee in a lo rel tawh thu tam tak thlir hovin, a thurel pawimawh zualte chu hetiang hi a ni :

1. Birth certificate lem tam ta lutuk chu tihreh ngei tulin a hria a. Hemi kawngah hian nu leh paten an fate pian hnuah Birth Certificate siamtir nghal thin nise. Hei hi Matric (HSLC) Certificate ah a dik ngei hmang tura hriattir nghal tul an ti a. Tunlai Computer tam tak avanga a lem lo siam a, seal lem lo siam te pawh an awm niin a lang a, hei hi Mizoram ah tihreh tul an ti hle.

2. Matric Exam dawn a kum tihdanglam tum fo hi sual a ni a ; nu leh pa, khawtlang hruaitute leh YMA te pawhin theihtawpa thil dik tih a nih theih nan tan la turin an ngen nghal a ni.

3. Naupiang leh mitthi an awmin Birth & Death Registrar hnenah chingfel nghal vat turin mi zawng zawngin mawh kan phur a, Doctor te pawhin dik taka naupiang leh thi certificate pek nise tul an ti hle.

4. Kum 1992 atangin MCCD (Medical certification of Causes of Death) hi khawpui leh khaw li (4) ah hman tan a ni tawh a. Mizoram Hospital-a Doctor ten an thih chhan dik tak (natna) te ziahfel sak thin se a tul hle a; hei hi Supreme Court in a ngaih pawimawh em avangin, theihtawpa tan lak tul an tih thu sawiin, inzirtirna hun (training) programme pawh siam nise tul an ti hle.

5. Mizoram Economic & Statistics department hi tun aia chak a hna an thawh theih nan nasa taka tih chak a tul a, sorkarin thawktu pek belh ngei tulin an hria a ni.