Mizoram sawrkar Art & Culture Department hnuaia inziaklut pawl hrang hrang intelkhawmna Mizo Cultural Artistes’ Association chuan a din champhaphak vawi 14 na chu vawiin khan I&PR Auditorium ah an hmang a. Kum puan thupui ‘Aia Upa Zah’ sawihona Mizo Culture te, zai leh chheih te nen hun hman a ni.

Rising Day khuallian Art & Culture Director Pu Ngurbiaka chuan Mizoram sawrkar hnuaia Art & Culture Department hi department zawng zawng zinga te ber pawl leh sum pai pawh ngah lo ber zing ami, mite inpekna avang chauh a kal ve hram hram a ni tiin ram pumah erawh chuan cultural policy lian tham tak kalpui anih avangin Inter-State Cultural Programme te hnam ziarang leh nunphung humhalh leh chhawmnung kawngah te chak takin hma a la chhunzawm thei reng a ni a ti. Pawl reng reng tana pawimawh ber chu tangrualna a ni tia sawiin Director chuan pawl thahrui chak nan sum pai a pawimawh a amaherawhchu sum paiin pawl a tihchhiat theih fo avangin MCAA te pawh hetiang kawnga fimkhur turin a chah a. Art & Culture Department nghenchhana pawl tangkai tak leh nun tak a awm thei chu an hruaitu leh member zawng zawng te chungah lawmthu a hrilh a ni.

Pu Ngurbiaka hian MCAA Rising day lawmpui nan Rs. 5,000/- a hlan a, kumpuan thupui an thlan ‘Aia Upa Zah’ tih a puang nghal a. Pu P.L. Liandinga Khatla South chuan thupui a sawi hawn zui nghal a ni.

Mizo Cultural Artistes Association hi 9th July, 1998 khan Art & Culture Department hnuaia Mizo lam leh zai zir chhuak thahnemngai zual tlem te in an din niin tunah hian he department hnuaia affiliated club 10 chuang intelkhawmna a ni a, member 100 chuang an awm mek a ni.