Remna leh muanna tluantling nei turin sorkarin theihtawp a chhuah a, remna tibawrhbanga, mipuite ti ralti tu reng reng chu sorkarin a ngawihsan mai mai dawn lo, Home Minister Pu R. Lalzirliana'n a ti. He thu hi  nimina Keifang Venglai-in an Community Hall a  Mizo Hmeichhe Insuihkhawm Pawl (MHIP) Day lawmna an buatsaih a hmanpui tuma a sawi a ni.

Tun hnaiah pawl thenkhatin remna tichhe zawnga khawsain Mizoram chhungah harsatna an siam a, hmar lama khaw thenkhatah VC inthlan an tibuai a, tukluih chhiah an khawn a, Zofate insuihkhawmna pawl thianghlim YMA din an khap bawk a, hei hian sorkar ngeng a chhun a, sorkar thin a ti rim hle a ni, Home Minister chuan a ti. Heng helpawl inti te hotu sorkarin a man tak te chhuah turin Chief Minister hnenah dilna an thehluh thu leh ama hnen ngeiah pawh Manipur-a pawl hrang hrang insuihkhawm lian tak hotu ten zai dawh taka khawngaih dilin heng mi te hi chhuah phalsak tura an rawn ngen thu Home Minister hian a sawi a.  Sorkar duhdan lo angin engmah kan ti tawh lovanga, tukluih chhiah kan khawn tawh lovanga, sorkar hnathawkte leh ni za inhlawh te hnenah chanpual kan phut tawh lovanga, Sinlung Hills Development Council huam chhungah YMA hi an duhna apiangah an ding leh nghal anga, an seal pawh an lakir leh nghal vek ang an tih theih hunah chauh he an Bail dilna hi sorkarin a ngaihtuah thei ang, Home Minister chuan a ti.

Pu R.Lalzirliana hian MHIP Day vawi 38-na chu nimin khan a biala Keifang Venglai, Leitan leh Venghlunah a hmanpuia. MHIP chu lungrual taka Mizo hmeichhiate insuihkhawmna pawl, hmeichhiate zahawmna chawinungtu niin mahni mimal hamthatna chauh ngaihtuah lova  midangte tana malsawmna ni chhunzawm zel turin a chah a. Hmeichhe tha chuan chhungkua a uap khawm a, a tihlim a, chhungkaw zahawm a siam thin a, hmeichhe thalo erawh chuan chhungkaw kehdarh awlsam takin a siam thei tih hre thar leh turin Pu R Lalzirliana chuan MHIP Day lawmna a kalkhawm te a chah a ni. 

Pu R. Lalzirliana hi a thiannu Pi Lalthangmawii'n a tawiawm a. MHIP Day lawmnaa lokal zinga tar kum 70 chunglam Venghlunah mi 26, Venglaiah mi 11, Leitanah mi 9 an vaiin mi 46 hnenah puan bih tur a sem a. Venglai Community Hall-a hman tur PA Set lei nan cheng nuai 1 Pu R. Lalzirliana hian a hlan bawk.