Vawiin khan Mizoram Environment & Forest Consultative Forum (MEFCOF) leh Lamchhip khaw aiawh NGO hrang hrang hruaitu ten Ramngaw leh Nungcha humhalhna hmun ‘LAMCHHIP ZOTHEI HUAN’ dinin thawhhona Thuthlung an ziak.

Thawhhona Thuthlung hi MEFCOF aiawhin President Pu V.L. Bela leh Lamchhip khaw aiawhin C.Laltanpuia, VCP, Pu Vanlaldika Sailo President, YMA ; MUP President leh MHIP President ten hming an sign a ni.

He hun ah hian Rev. Dr. F. Sangkhuma Vice President,MEFCOF in an pawl chanchin leh hmalakna te chu sawiin MEFCOF hi Mizoram a Ramngaw leh Nungcha humhalh turin kum 2004 a din a nih thu a tarlang a. Mizorama Ramngaw chereu nasa lutuk leh Sava leh Nungcha te tlem ta lutuk chu veiawm tiin a humhalh hna hi khaw hrang hrangah an lo tlangau pui tawh a. A hlawhtlinna pawh khaw tamtak ah hmuh a nih thu a tarlang.

He an hmalakna ZOTHEIHUAN tih a hming vuah hi tun dinhmun ah Mizoram chhung khaw hrang hrang 100 ah din a nih tawh a, Lamchhip chu khaw 101 na a nih thu a tarlang tel bawk.

Zotheihuan enkawl tur hian khaw tin ah Co-ordination Committee din vek niin, VCP apiang chu Chairman niin, YMA President apiang chu Secretary niin, MUP President apiang chu Treasurer leh MHIP President apiang chu Finance Secretary an ni a, heng NGO zawng zawng a OB te chu Committe Member an ni.

He hun hi Pu C.Laltanpuia, VCP, Lamchhip in a kaihruai a ni.