Kolasib atanga 26 km a hla Meidum rama leihnuai hausakna zawn hna thawk mektu Oil and Natural Gas Commission ONGC te chuan thla thum chhung chauh hna an thawk tihin  lei hnuai 2440 metres a thuk an verh tawh tih anmahni tlawhtu  Transport Minister Pu PC Zoram Sangliana an hrilh.

Pu Gupta, Addl. Manager ONGC, Meiduma hnathawh mek enkawltu chuan an hnathawh dan phungte Minister hi alo hrilhfiah a. Kumin February ni 1 -a hna an tan thu leh hun reilote chhunga chak tak leh tluang taka an thawh theihna chhan chu Mizoram sawrkar atanga puihna duhawm tak an dawn avang leh khawtlang atanga harsatna an neih loh vang te a nih thu a sawi a. An lei verh atanga lei leh dum rimchhia an paihna Pollution Control Board tena an sawisel chungchang pawh tih dan thar an rek hnuah chinfel a ni , a ti.

ONGC hian lei hnuai thuahthip metre 4300 thleng verh an tum a.  Kumin June/July thla vela thlen hman an inring a. Metre 3000 vel an verh thlen hunah chuan leilung hausakna engemaw tak chu hmuh ngei an inrin thu Pu Zoram Sangliana hi an hrilh a ni. Nilaini kalta a ONGC Drilling site a tlawh tum hian an hnathawhna hmun hrang hrang, leihnuai thuah tina leilung them, soil sample an lak laboratory a an endik dan te, chirhdiak an sawngbawl dan leh Sattelite hmanga nitina an hnathawhte an hmunpui - Dehradun, Delhi leh Silchar lama an thawn dan te  kimchang takin an lo entir a ni.

ONGC Drilling site ah hian hnathawktu 50 velin nitin hna  an thawk a. Heta thawkte hi a tlangpuiin thiamna chi hrang hranga Engineer te an ni hlawm a ni.