2593/2023-2024

Aizawl, the 2nd November 2023: India ramin zalenna a hmuh champhaphak kum 75-na lawmna ‘Azadi Ka Amrit Mahatsav’ kharna leh tlipna atana sawrkar laipuiin rampuma kalpui tura a ruahman “Meri Maati Mera Desh’ Campaign chu Mizoramah pawh August ni 9, 2023 khan hman tan a ni a. Sports & Youth Services Department Secretary Dr. Lalrozama, State Nodal Officer leh David L. Pachuau, Asst. State Nodal Officer te kaihhruaina hnuaiah Mizoram sawrkar Department hrang hrang Home, EF&CC, GAD(SAW), UD&PA, AMC, RD, A&C, I&PR te leh District hrang hranga DC leh SP te, BDO, NYK Volunteer ten MMMD programme hlawhtling taka kalpui a nih theih nan theihtawp an chhuah a ni.

MMMD Programme hi hlawm pawimawh tak tak pangaah then a ni a - zalenna sualtute hriatrengna lungphun (Shilaphakalam) te, tualto thing 75 phun (Vasudha Vandhan) te, zalenna sualtute leh an chhungte zahna lantir (Veeron ka Vandhan), ram chhung lei (soil) khawn khawm (Mitti Kalash Yatra) te leh a puala hun hman (Ceromnial Program) te an ni. District leh Rural Block te chuan urhsun takin MMMD hi an kalpui a. Zalenna sualtute, venhimna lama thawktute, CAPF, State Police (chawl tawh emaw boral tawh) ram tana hnathawk tha te zawnchhuah niin an pual hian tum 247 zet State chhung hmun hrang hrangah hun hman a ni a. MMMD puala hun 405 buatsaihah mi 30660 zet an tel thei bawk.

State pum huap MMMD Ceremonial Program chu August ni 25, 2023 khan MINECO Building-1 tualah hman niin MMMD Campaign peng pawimawih tak tak - zalenna sualtute hriatrengna lungphun (Shilaphakalam) te, tualto thing 75 phun (Vasudha Vandhan) te, Paanch Pran thutiam lak hona te, mi huaisen leh an chhungte chawimawina hun te bakah Hnam puanzar pawh pharhna hun leh hnam hla sak hona hun te hman a ni.

New Delhi-a tualto thing 75 phunna – 'Amrit Vatika' a dah tur Mizoram lei (soil) te chu September 1-30 chhung khan khaw hrang hrang atangin lakkhawm a ni a. Heng te hi Block leh District hmunpuiah te thehluh an nih hnuah, Aizawlah October ni 1-23 chhung khan lakkhawm leh a ni a. New Delhi-a thawn thlak tur lei ‘Mitti Kalash’ pual hian S&YS Conference Hall, MINECO-ah State Level Cultural Program neih a ni bawk.

Mizoram District 11 leh RD Block 28 aiawh te chu New Delhi-a Mizoram lei ‘mitti’ dah turin October ni 27 khan Mizoram an chhuahsan a. Sawrkar laipuiin October ni 30 leh 31-a Kartavya Path hmuna MMMD kharna inkhawm ah telin; he hunah hian India ram hmun hrang hrang atanga lei an ken te chu hmun khatah chhun khawm a ni a, India tualto thing huan 'Amrit Vatika' siamna atan hman a ni dawn a.

Mizoram atang hian State Addl. Nodal Officer Pu David L. Pachuau, Jt. Secretary, Sports & Youth Services hovin District aiawh mi 11, RD Block aiawh mi 28 leh Nehru Yuva Kendra volunteer mi 14 an tel.