Mizoram Supply Executive Association (MESA) chuan vawiin khan Aijal Club-ah Special Conference an hmang a, Supply Minister Pu H Rohluna chu khuallian a ni.

Supply Minister chuan buhfai Mizoram-in a hmuh chu 2001 chhiarpui a mihring awmzat behchhana Normal Allocation pek a ni a, amaherawhchu sorkar leh thawktute inpekna avangin vawiin thlengin tumah chhuanchham an la awm lo a ni, a ti. Minister chuan sorkarin economic cost rate aia hniama lei theihna tura sorkar laipui a nawr reng thu sawiin mirethei ten buhfai tlawm zawka an lei theih nan nasa takin tan a la a ni, a ti a. Gas chungchang harsatna pawh sawi langin Mizoram chauh ni lo, rampumin harsatna a tawh thu leh kan mamawh za a sawmriat vel lai hi ram pawn atanga chawk luh a nih avangin international rate anga kal ve zel a tul a, hei hian gas man a ti pung zel a ni, Pu H Rohluna chuan a ti bawk.

MESA Special Conference-ah hian Food Civil Supplies and Consumer Affairs Secretary Pi M Zohmingthangi IAS chu khualzahawm a ni a. MESA -ah hian member 200 vel an awm in chawhnu lamah rorelna leh 2013-2014 hruaitu tur an thlang a ni.