State Bank of India (SBI), Aizawl Branch in Spastic Society of Mizoram ina a enkawl, Gilead Special School hnena Bus - Tata Starbus - a pek chu tukin khan SBI Aizawl Brancha a hlanna inkhawm tawi buatsaihah, Chief Minister Pu Lal Thanhawla chuan Pi Zokhumi Vankung, Chairperson, Spastic Society of Mizoram hnenah bus chabi a hlan.

Chief Minister chuan SBI in mipui vantlang tana an inpekna hi a zahawmin a ropui a ni a ti a. An Corporate Social Responsibility (CSR) ah vantlang hnena an mawhphurhnaa ngaia, a thlawna Gilead Special School hnena Bus an pe hi a ropuiin a lawmawm hle a ni a ti a. Hetianga vantlang tana thil tangkai an ti thin hian mipuite hnenah thu tam tak a sawi ngei ang a ti a. Lal Isua’n ‘heng mi te ber chunga in tih hi ka chunga ti in ni’ a tih kha SBI te hian an zawm tha hle a ni a ti.

Chief Minister chuan Spastic Society of Mizoram nen inzawmna (associate) an neih reng thu sawiin, SBI in Bawngkawn Branchah TNT hnena LPK Truck an pek tuma an hotute hnena Gilead Schoolin bus an mamawh thu a hrilh kha an la hre reng hi a lawmawm hle a ni a ti a. Gilead Schoolin an mamawh tak an dawng chu a lawmpui thu sawiin, a petu SBI pawhin nasa leh zuala malsawmna a dawn zel a duhsak thu a sawi bawk a ni.

Inkhawma tel SBI Chief General Manager, N.E.Circle, Guwahati Pu Rajneesh Kumar chuan an hna pangngai piahlamah vantlang tana hnathawh hi kan ngaihpawimawh ber pakhat a ni a ti.

Bus dawngtu Pi Zokhumi Vankung, Chairperson, Spastic Society of Mizoram chuan SBI in kumtin deuhthaw tanpuina an pek thin thu a sawi bawk.

SBI hian Corporate Social Responsibility hnuaiah Mizoram hmun hrang hrang district tina school ah kumin november thla thleng hian water purifiers/filters 712 an lo pe tawh a, ceiling fans 290 an pe tawh bawk a ni.

Inkhawmah hian Pu Lalthuamliana, Regional Manager, RBO, Aizawlin lawmna thu a sawi bawk a ni.