Mizoram Football Association chuan vawiin khan All District Football Association Joint Meeting I & PR Conference Hall ah an nei a. I & PR etc. Minister Pu Lal Thanzara MFA President nibawk chuan a hmanpui a. Mizoram chhung District hrang hranga DFA hotute an tel tha hle.

Sports lamah hian Sorkar atanga duh anga sum kan nei tha lo chung pawhin infiamna lamah hma kan sawn chho zel thei leh MFA anga mawhphurhna te pawh hlen chhoh zel a ni hi lawmawm a tih thu sawiin Pu Lal Thanzara chuan hmasawn zel tur hian kan la tlai lova, sports lamah kan tih tur kan hlen zel dawn a ni, tiin tih takzeta kan thawhhona tha tak avangin Football ah phei chuan sang taka invawrh thei hi kan ni tih a chiang hle a. Kan hotute thusawi hi zawmin ngaithla ila, tuna keini in tan kan laka kan theihna leh kan thiamna te hmang chho zelin thangtharte tan sulsutu niin hma hruaitu nih zel a ngaih thu a sawi.

Mizoram hi kan hriat angin zan lamah Kohhran Inkhawm thin kan ni a. Programme pawimawh leh Inkhelh buatsaih dawn pawhin inkhawm loh zan te kan tinzawn lo thei lova hengah te pawh hian inhriatthiam tlan a ngai a ni tiin Lammual hi Assam Rifle te kutah a la awm chungin kan duh leh mamawh hun zanlam thleng pawha kan hmang thei hi a lawmawm em em a ni tiin Lammual te hi dim tak leh uluk taka enkawl chhoh zel hi kan tih tur a ni Pu Lal Thanzara chuan a ti bawk.

FIFA chuan MFA hnenah Artificial Grass a pek thu leh he Grass hi Sairang Dinthara a MFA field a phah tur a ni a, hetah hian MFA chuan Football Academy changtlung tak siam turin ruahmanna a kalpui mek a ni tih sawiin Pu Lal Thanzara chuan FIFA in India ramin state 6 Football development a tumna ah keini Mizoram te hi min telh ve a ni tih sawiin Football ah hian thu lawmawm tak hriat tur a awm chho zel a ni tiin nakum 5 – 6 January 2016 hian German Student Football Team te Aizawl ah lokalin kan khelmual Lammualah Football an rawn khel dawn a ni, a ti a. Hemi hlawhtlinna hi a lawmawm thu sawiin MFA President chuan kum hmasa lama German lam Football Coach Aizawl a lo zina an lo kawmna leh an in biak zuina kalzel a ni tih sawiin India ramah kan Football Team te kan rawn tirh dawn phawt chuan Aizawla rawn kal ngei tura hmalak a lo in tiamna tih hlawhtlinna a ni a ti.

MFA Honorary Secretary Pu Lalnghinglova Hmar kaihhruai vawiin Joint Meeting ah hian Registration chungchang leh MFA Technical Rules siamthat te bakah Agenda pawimawh tak takte sawi ho a rel ho a ni.