Vawiin khan Mizoram Finance & Accounts Service Association (MFASA) chuan Tourist Lodge, Chaltlangah Annual General Conference vawi 19-na an hmang a, Finance Commissioner Pi L.N. Tochhawng chuan Khuallian niin a hman pui.
Pi L.N.Tochhawng chuan MFASA Annual General Conference hman pui tura sawm a ni chu lawmawm a tih thu sawiin, Mizoram Finance Department-a a thawhna la reilo mah se, thawhhona tha tak an neih avangin lawmthu a sawi a. Member-te chu mipui sum enkawlna kawngah leh sum vawn dan hrang hrangah hma an sawn chho mek zel a ni tih sawiin; member tinte chu ngaihdan thar leh tihdan thar awmte zir zel tura fuihin, an thiamnate tipung turin training kal tam a, chhawr tangkai turin a chah bawk.
Awlsam leh chak zawka hna thawh anih theihnan, khawl hmanga hnathawh (computerized) bultanna Treasury Office pali-a kalpui mek chu a hlawhtlin thu sawiin, Treasury Office dangah pawh kalpui a nih tur thu a sawi a; hlemhletna leh eirukna tikiam turin E-Payment pawh reiloteah hman theih a nih tur thu a sawi bawk.
Pi L.N.Tochhawng chuan mipui sum vawngtu an nih angin, mipuiten anmahniah beiseina sang tak an nei a; sorkar laipui atanga tanpuina sum haichhuah kawngah te, sum hmanna tur dik tak a hman a nih theih nan leh sum enkawlna felfai a awm zel theih nan, MFASA member tinte chu rinawmna leh dikna hmachhuan a, rintlak leh chhawrnahawm tak an nihna chawi nung zel turin a chah bawk.
He hun hi Pu R. Lalbiakthanga, MFASA President chuan kaihruaiin, Pu Zokunga, Secretary leh Pu Lalringliana, Finance Secretary-te hnen atangin Report ngaihthlak a ni a. He inkhawmah hian MFASA member thar mi 14 lawmluhna hun hman a nih bakah, kumina an member chatuan ram pan ta, Pu Lalthlamuana, Treasury Officer, Kolasib Treasury sunna hun an hmang bawk a; Pu Ramchhuana, Asst. Secy., MFASA chuan lawmthu sawiin chawhma inkhawm hi a khar a ni. Chawhnu lamah hian rorel inkhawm neih niin, kum 2013-2014 chhunga an pawl hruaitu turte an thlang nghal bawk.
Mizoram Finance & Accounts Service Association-ah hian member 76 an awm mek a, kum 2012-2013 chhungin an member mi 14 kaisangin, mi pakua (9) superannuation pension-a chhuak an awm a, mi thar 14 an nei bawk a ni.
