3269/2023-2024
Aizawl 8th January, 2024 : Mahatma Gandhi NREGA (MGNREGA) hnuaia mipui (Job Card holder) te hlawh (wage) pek dan chungchang hi Rural Development Department, Mizoram Sawrkar chuan mipuite hnenah sawifiah tulin a hria a. MGNREG Act leh Operational Guideline angin MGNREGS hnuaia mipuite inhlawhna (wage) hi Mizoramah pawh thlatin tluang taka kalpui thin a ni a. Chutihlaiin, tun hnaiah thingtlang mipuite inhlawhna Central in a la release loh avangin Job Card holders te account-ah la lut lo a awm nual tih hriat a ni a. MGNREGS hnuaia thingtlang mipuite inhlawhna wage payment hi Central Sawrkar duhdan leh ruahmanna angin online leh electronic payment vekin NeFMS hmangin kalpui a ni a. Mipuite inhlawhna mil zelin Software- NREGASoft hmangin FTO (Fund Transfer Order) te MIS ah siam zel a ni a. Heng FTO hmang hian Central Sawrkar chuan hnathawktute/Job card neitute Bank Account-ah direct-in inhlawhna pawisa a rawn thun thin a ni.
MGNREGS hnuaia inhlawhna Wages bik hi Central Sawrkar atanga 100% direct funding a ni a. Wage payment hi Mizoram Sawrkar Finance Department kaltlang loin, Job Card holder te Account-ah Direct Benefit Transfer (DBT) hmangin Central Sawrkar-in a rawn thun (credit) tlang thin a. Mipuite inhlawhna ang zelin Mizoram Sawrkar Rural Development Department chuan FTO hi MIS-ah District leh Block tina thawktute kaltlangin a siam (generate) sak nghal zel a. Tun dinhmunah, Mizoram Sawrkarin tihkhawtlai (pending) engmah a nei lo a ni. Inruahman lawk ngai hrang hrang heng- FTO siam (generate) leh UC thehluh te pawh 2023 Christmas hma khan a ti vek tawh zawk a ni. Central Sawrkarah a rang lama mipuite inhlawhna release thuai turin a dil mek a. Central Sawrkar pawhin a tahtawlin mipui inhlawhna leiba (liability) te hi a rawn clear leh thuai beisei mek a ni a. Hemi chungchangah hian Mizoram Sawrkar chuan hma a la mek a. Central Sawrkarin an rawn release hunah kan inhlawhna pawisa te pawh Job Card holders te account-ah theuh a luh leh nghal dawn avangin thingtlang mipuite lo chiai lo tur leh dawhthei taka lo nghak hram hram turin Rural Development Department chuan a ngen a ni.
Tun dinhmunah Mizorama MGNREGS hnuaiah active workers awm zat chu mi 2,18,581 an ni a. Job Card holders te tan hian December, 2023 thleng khan 1,52,51,426 Persondays siam sak tawh a ni a. Tun kum kal meka Job Card holders, chhungtin te inhlawhna pek tawh dan average chu 69.96 a ni mek bawk a ni.
