Champhai District Bawrhsap Pu Vijay Kumar Bidhuri IAS chuan vawiin khan Champhai District DRDA ah ni 100 inhlawhna MGNREGS Annual Report 2010 - 2011 an buatsaih chu DC Conference Hall-ah a tlangzarh.

Tlangzarh paha thusawiin DC chuan MGNREGS hi chhungkaw tin khawih phak anih avangin mipuin an ngaihven em em reng a, hemi chungchanga mipuiin lungawi lohna an neihte chu a guideline ah a chinfel dan tur a inziak sa vek a, hei hi hman tangkai dan kan thiam a ngai a ni. Thil dik lo nia kan hriatte hotu lian lamah thlen ngal mai lovin Village Level Grievances and Redressal Committee ah kan thlen phawt tur a ni a, chuta tang chuan BDO ah dan ang takin a kal chho tur a ni, a ti. Ni 100 inhlawhna ah hian mipui pawisa dawn tur lo cut sak phal a ni lova, khawl hman phal a ni hek lo a ni, hemi chungchangah hian complaint a awm chuan dan ang takin hmalak zel a ni ang, a ti bawk. DC chuan mipui inhlawhna te dik taka hman anih theih nan Village Level Vigilance & Monitoring Committee leh V/C te tun ai hian inpawh se a duh thu a sawi a. DRDA in hetianga Annual report bu tha tak an siam thei chu fakawm a tih thu a sawi bawk a ni.

DRDA Project Director Pu Zothanmawia pawhin thu sawiin Annual Performance Report Bu hi a zawna kum 3 an siamna anih tawh thu a sawi a. BDO ten khaw tina V/C te hnathawh, a thlalak nen an rawn thawn a, chuta tang chuan hetiang bu hi a chhuak thei ta a ni, a ti. Project Director chuan kum 2010 - 2011 chhung khan MGNREGS atan hian Central atangin cheng nuai 3726 leh State Share atangin cheng nuai 281.4 an dawn thu a sawi a, hei bakah hian Bank Interst nuai 27.7 nen a vaia sum an dawn zat chu cheng nuai 4071.53 a ni, a ti a. A hmanna lam sawiin kum kalta chhung khan mipui inhlawhna ni 100 buatsaih tlin a ni a. Mipui inhlawhna atan sum hmanral zat hi cheng nuai 3095.93 a ni a, Material Component atana V/C te hnena pek chu cheng nuai 461.93 a ni a, khaw 40 a BNREGSK sakna atan cheng nuai 306.10 hman a ni a. Administrative Coast ah Central in za a 6 hman min phalsak laiin 4.75% kan hmang a, hemi atana kan sum hman zat hi cheng nuai 192.55 a ni. Sum hman bang kan neih chu cheng nuai 15 vel a ni, a ti bawk. RD Block hrang hranga Job Card awm zat tarlangin Ngopa ah 3843, Khawzawl ah 8833, Champhai ah9136 leh Khawbung ah 4584 a ni, a ti. Pu Zothanmawia chuan kum 2011 - 2012 ah hian ni 15 inhlawhna kan nei zo tawh a, tunah hian ni 10 inhlawhna kan pechhuak leh mek a, sum hman bang ni 12 vel inhlawhna daih tur kan la nei dawn bawk a, hei hi kan puitlin anih chuan Champhai District ah ni 37 inhlawhna kan siam thei dawn a ni, a ti.

He meeting ah hian Press miten zawhna an neih hrang hrangte chu Project Director te leh BDO ten an chhang bawk a ni.