Vawiin khan Pu Lal Thanzara, Parliamentary Secretary chuan Rs. 30,84,879 senna Thiak leh Maubuang inkalpawhna kawng 1.600 km a sei chu a hawng a. He kawng hi SGRY leh BAFFACOS suma bul tan niin, MGNREGS suma laih zawh a ni a. Kawng laih hna hi kum 2006 atang khan tanin, BAFFACOS sum leh SGRY sum hman zawh a nih hnuah kum 2009 khan MGNERGS sum hmanga chhun zawm leh a ni. He kawngah hian Slub leh retaining wall siam a ni a, heta tang hian Rs. 19,72,820 sen a ni bawk.

Hemi hnu hian Parliamentary Secretary hian Awithangpa Hall, Maubuang a mi chu a hawng bawk a, He hall sak zawhna atana sum sen zat hi Rs. 11,30,166 sen a ni. He Hall sak hna hi kum 1997 Oct. ni 24 khan helai bialtu BDO Sangthuama\'n a lung a lo phum tawh a, hna engemaw zat thawh a nih hnuah chhunzawm loh a awmin, Maubuang khaw VC tharte chuan kum 2001 atang khan thar thawh lehin tunah hawn theihin sak zawh a ni ta a ni.

Pu Lal Thanzara hian Sibuta lung leh Tachhip kawng black top loha awm chu en nghalin, sorkar kum thar remchang hmasa berah black top tihsak a tum thu a sawi bawk.

Khualzahawm KS Thanga, Parliamentary Secretary, Finance pawhin thusawiin, hun rei tak chhung zirtirtute hlawh la pek loh chu tunkar chhung ngeiin pek sorkarin a tum thu a sawi.