Zoram pum huap Mizoram Gorkha Youth Association chuan vawiin khan Kolasib-Venglaia St. Joseph’s Parish Hall-ah an Annual Conference vawi 36-na an hmang a, Pu PC Zoram Sangliana, Art & Culture Minister chuan khuallian niin a hmanpui.

Thu sawiin Pu PC. Zoram Sangliana chuan, Gorkha te chu Zoram nuam siam turin mawhphurhna in nei a, ram neitu in ni tih inhre chungin hnam hrang hrangte nena boruak tha tak siam chhunzawm zel turin tan la ang che u,a ti. Eng hnam pawh ni ila, Pathianin min siam danah tum a nei a. Mahni hnam nihphung leh zia chawisan hi kan tih tur a ni tih kan hriat fo a tha a. Gurkha te hian in zia zahpui lova chhuang taka in nihna in lantir fo thin hi ka chhuang takzet che u a ni, Pu Ramsanga chuan a ti a. Khawvel khawi hmunah pawh awm ila, mahni hnam zia leh nihna hi kan zahpui tur a ni lova. Nangni Gorkha tepawhin he in kalphung hi chhawmnung zel ang che u, a ti a. Democracy ram, India Danpui hnuaia mahni sakhua leh Culture zalen taka kalpui theia kan awm hi kan vanneih zia i hre bawk ang u, a ti a ni.

Pu Ramsanga chuan, inthlan a hnai a, tu tuten emaw kanin hmangaih siak leh dawn che u tih hre reng chungin thudik erawh chhut thiam turin a chah a. Gorkha te chu sawrkarah neitu dik an ni tih inhre chunga tawiawm tura chahin an harsatna tepawh a theih anga thuneitute hnena thlen a inhuam thu a sawi a ni. Zoram chhunga cheng hnam tinte zia pholang thei tur Heritage Village din tura Concept Paper cheng 36 vbc senna tur Central-ah thawn mek a nih thu Minister hian a sawi bawk a ni.

Pu R. Lalzokima, Secy, Kolasib Sub Hqrs YMA,he huna khual zahawm chuan thu sawiin Mizoram ti hmasawn tur chuan a chhunga cheng hnam tinte hi kan inlungrual a ngai a ni, a ti a. MGYA te chu an din chhan anga tha taka kal zel turin a chah a ni.

Pu Anup Chhetri, MGYA President chuan inlawmna thu a sawi a. Pu BS Thapa, MGYA Sub Hqrs Kolasib chuan Mizorama Gorkha te chan chin sawizauna a nei bawk a. Hnam lam hmuhnawm tak tak entirin zai ngaihthlak a ni bawk a ni.