Vawiin khan Chief Minister Pu Lal Thanhawla chu a chenna in CM Bangla ah Ministry of Home Affairs-a Adviser North East (Bru) Pu M. K. Singla chuan a hmu a, Tripura Refugee Camp a awm Bru chungchung a sawipui a, heng Camp a awm te Mizoram an rawn kir leh theih nan theihtawp chhuaha hma lak mek a nih thu sawiin tun thlenga Mizoram Sawrkar, a bik takin Home Department hma lakna te chu tha leh fakawm a tih thu te a sawi bawk a ni.

Chief Minister Pu Lal Thanhawla chuan Mizoram atanga Bru an chhuah dan hrilhin he thila intihmingchhiatna leh puhna hrang hrang Sawrkar leh pawl ten an lo tawh thu te a hrilh a. Pu Singla chuan heng thu te hi a hriat thu sawiin Bru zinga an hruaitu thenkhat in an mipui an hruaisual a, an mahni hmasialna avangin an hruaikirna repatriation pawh an tihthuanawp thin a mahse he thil hi hun bituka (time-bound) chinfel a nih theih nan ruahmanna siam mek a ni, a ti a Pu M.K. Singla in Bru chungchang thilah Nodal Officer ruat tura Chief Minister a ngenna chu tih vat anih tur thu Chief Minister hian a hrilh.

Pu M. K. Singla chuan Bru ten tun hnaia thil thar an ngiat chu awm a tih loh thu sawiin he thil hian tawp a neih a ngai a, hun ruahman a nih hnuin chumi hun chhung ngei repatriation hi zawhfel a nih theih nan tanlak a ni ang, a ti a. Chief Minister-in ruahmanna siam hnuah pawh an lo kir duh loh chuan engtin nge Home Ministry in a tih zel ang tia zawhna a siam chhangin Pu Singla chuan chumi a thleng anih chuan Refugee Camp te chu khar leh tanpuina an hmuh thin ang angte pawh tihtawp anih theih nan hma lak mai tha a tih thu a mimal ngaihdan a sawi.

Chief Minister chuan Pu Singla-in a tir atanga thil awm dan leh thil thleng a hriat te chu lawmawm tiin Mizoram sawrkar in theihtawp chhuaha he thil chingfel tura hma a lo lak dan pawh a hriatpui chu lawmawm a tih thu a sawi bawk.

 

Attachment

  • Loading attachment...