Vawiin khan Tripura Relief Camp-a cheng Bru laklet hna kalpuina tur chungchanga Mizoram rawn tlawhtu, Ministry of Home Affairs, Special Secretary (internal Security), Pu M.K. Singla chuan Mamit District chhung Saikhawthlir khua Reang (Bru) laklette awmna hmun tur a tlawh.

Pu M.K Singla Special Secretary MHA chuan mipui kalkhawmte hnenah thu sawiin Reang (Bru) te chu an kalsan tak Mizoramah kir leh ngei ngei turin a sawm a. Tun ang hun remchang hi a tawpna anih tawh avangin bawhpelh lova an rawn let ngei a beisei thu a sawi. Heng Reang (Bru) hruaikir an nih huna an awmna tur hmunhma atana thlan Saikhawthlir Reang ( Bru) te awmna tura ruahman chu a hmunah kalin a enfiah nghal bawk.

Tripura Transit Camp paruka Reang ( Bru) te Mizoram mi leh sa dik takte hruaikir lehna tura hna hmasa atana Sorkar laipui ruahman angin enfiah hna hi Nov 2 atang khan Mizoram Officials te chuan camp hrang hrangah boruak muanawm tak hnuaiah an lo nei tawh a. Hruaikir hna hi ruahmanna awm sa ang chuan January thlaah thawh hman tura beisei a ni.

M.K.Singla hi District Bawrhsap Pi Lalbiaksangi chuan lo dawngsawngin, All NGO's Saikhawthlir chuan amah lawmna thilpek an lo hlan a. Anni bakah hian Pu Abhishek Dhania, SP Mamit, Pu H.Lianzela, Addl.DC Mamit, Pu David H.Lalthangliana, OSD( Home), Pu Elvis Chorkhy, Chairman, Bru Co-ordinatian Committee bakah District Level Joint Monitoring Group Member te leh official dang te'n an tawiawm bawk a ni.