1309/2026-2027

Kolasib, 6th July, 2026: Vawiin khan Diakkawn YMA Hall-ah Mizo Hmeichhe Insuihkhawm Pawl (MHIP) Diakkawn Branch, Kolasib chuan an din champha phak kum 50-na, Golden Jubilee an hmang a, he hun hi Mizoram Legislative Assembly Deputy Speaker Pu Lalfamkima chuan khuallian niin a hmanpui.

Jubilee lawmna inkhawm chawhma hun hi Pi Sanghmingthangi, President, MHIP Diakkawn Branch chuan a kaihruai a. Pi Saizikpuii (Ex-OB) in hunserh a hman zawhah, Pi Lalhmingmawii, Secretary hnen atangin report ngaihthlak a ni a, Pi C. Lalchhuanawmi, Adviser chuan an member pui an then tak te puala sunna hun a kaihruai bawk.

Khuallian Pu Lalfamkima chuan thu sawiin, MHIP chuan hun rei tak chhung hmeichhe dikna leh chanvo humhalh kawngah leh an dinhmun chawikang turin hma a la nasa hle a, khawtlang leh ram pumah hmeichhiate chu mi zahawm leh thil tithei an nihzia a lantir reng a ni, a ti. An hmalakna leh inzirtirna zarah hmeichhiate hi mahni inringtawk takin an rawn chhuak zel a, chhungkaw chhungah chauh ni lovin, sawrkar hna pawimawh leh kaihhruaina hnaahte thlengin an inrawlh nasa ta hle a, ram hmasawnna kawngah thawhhlawk tak an ni ta tih hi a lang chiang hle a ni, a ti bawk.

Fate enkawlna leh zu leh ruihhlo dona kawngah nute chu khawtlang leh chhungkuaah an pawimawh em em thu a sawi a. "Fate nunphung siamtu leh an tana entawn tur hmasa ber an nih avangin, nuten an fate chu nun tha leh dik zawkah an kaihruai nasa hle a ni," a ti. Chutiang bawkin, zu leh ruihhlo avanga chhungkua kehchhe tur leh thalai tam tak nun chhiatna lakah nute chu venhimna banpui pawimawh tak an ni a; an fate leh an hmangaihte chu ruihhlo laka fihlim turin thu tha hrilhin zilhna an pe a, khawtlang himna kawngah pawh nute hi rintlak leh pawimawh tak an ni reng a ni, a ti.

MHIP-in hmeichhiate dinhmun chawikang tura hma a lakna bakah, mipa leh hmeichhia inthliar hrang lova inhuam za taka hmasawnna kalpui chu khawtlang hrisel zawk siam nan a pawimawh hle tih a sawi a. MHIP te chu kum 50 dang lo awm leh zel tur thleng pawha hma sawn zel turin duhsakna a hlan a ni.

He hunah hian Golden Jubilee Zaipawl atangin hla mawi tak ngaihthlak a ni a, Tv. Andrew Laltlankima, Nl. Juliet Lalruatpuii leh Pi C. Lalawmpuii te hnen atangin mal zai ngaihthlak a ni bawk. Diakkawn VC leh YMA aiawhte hnen atangin thusawi ngaihthlak a ni a, District Legal Services Authority (DLSA), Kolasib atangin dan lam (legal awareness) zirtirna hun hman a ni bawk. Jubilee lawmna pual hian tlai dar lamah  ruai theh nghal a ni.