Aizawl, the 5th of July, 2026: Mizo Hmeichhe Insuihkhawm Pawl (MHIP) din champhaphak vawi 52-na leh MHIP Day 2026 pualin MHIP leh pawl member zawng zawngte duhsakna leh lawmpuina ka hlan a che u.

"Mite Tanpui" tih thupui ropui tak changvawna July ni 6, 1974-a din, MHIP chu din a nih atangin Mizorama hmeichhe intelkhawm tlawmngai pawl lian ber ni chho nghalin, hmeichhia leh khawtlanga dawmkan ngaite dikna leh zahawmna humhim tur leh an hmakhua ngaiin thahnemngai takin a thawk thin a. Mizo hnam ziarang, nunphung hausa tak bakah pipu atanga kan thil rochunte vawnghim chung zelin khawtlang hamthatna leh ram hmasawnna turin nasa takin hma a la thin a ni.

Kum 50 chuang zet chu MHIP hian hmeichhiate dikna vawnhim, tharum thawhna leh enhranna thleng thei laka ven bakah inneih, inthen leh rokhawmna Dan ennawn kawngah tha nasa takin a thawh thin a. Zirna, hriselna, Dan hmanga tanpui ngai puih leh vantlang rawngbawlna kaltlanga MHIP-in chhawmdawlna a pek thin hmangin hmeichhia leh chhungkaw thahnem takte dinhmun a chawikang tawh a ni.

"Hmeichhiate hamthatna tur buaipui, dikna vawnhim leh vantlang rawngbawlna kaltlanga dinhmun chawikan" tih thupui nghet taka vuantu MHIP chuan khawtlang tan tangkai takin hma a la chhunzawm zel a. Chawimawina ngaihhlut hlawh tak Nari Shakti Puraskar, kum 2016-a hlan an ni kha hmeichhiate dinhmun chawikan kawnga an thawh hlawk zia leh inpekna thuk zia hriatpuina leh phu zia lantirna a ni.

Hmeichhia leh naupangte hamthat nana Sawrkar duan scheme hrang hrangte hlawhtling taka kalpui a nih theih nan MHIP-in Sawrkar, NGO dangte leh khawtlang mipui tha takin a thurualpui zel ang tih ka ring tlat a. Hmeichhiate hi nunphung zir tanna, thil tha engkim inhrilha seilen puina leh ram hmakhaw hun thui tak hriltu, chhungkaw tinte innghahna ban pawimawh tak an ni a. MHIP member-te hian Mizoram Hmasawn (Viksit Mizoram) siam tura hmalakna hrang hrangte a hlawhtlin theih nan dinhmun pawimawh tak an luah a. Chutiang zelin kum 2047-a India ram hmasawn (Viksit Bharat) siam tura Prime Minister zahawm tak Pu Narendra Modi hmathlir tihhlawhtlin kawngah pawh tha an thawh hlawk ngei ang tih ka ring tlat a ni.

He ni chhinchhiah tlak tak lawm a nih rual hian MHIP-te hlawhtlinna, chakna leh tun aia hmasawnna tam zawk hmu zel turin duhsakna ka hlan a ni.

Ka lawm e.

MHIP Day Chibai.