Mizoram mipui duh takte u

CHIBAI 

He hun pawimawh takah hian kan state hmangaih tak chhunga cheng zawng zawngte inzavaiin duhsakna ka hlan che u a, Independence Day vawi 80-na chibai ka buk vek a che u. 

He mellung chhinchhiah tlak tak kan lawm mek lai hian, zalenna kan neih theih nana an nunna hlu tak hlantu martarte thinlung taka zahna chibai bukin an hnenah lawmthu sawi ila, ram dang hnuaia kan kun hunlaia mipuite harsatna leh chhel taka an tawrh chhuah dante pawh i hre reng ang u. He tih rual hian kan mi leh sa zalenna sualtu ngaihsanawm tak tak - Lalnu Ropuiliani, Nikuala, Lianphunga Sailo, Zakapa, Khuangchera leh zalenna sualtu dangte zahna chibai kan buk a. An huaisenna leh inhlanna avangin India ram zalen leh kan ngainat em em hian tun dinhmun hi a thleng thei a ni.  

Independence kan hmuh avanga ram zalen leh inrelbawlna hran kan neih hlut zia hi hre thar leh theuh ila. Tunah chuan Prime Minister zahawm tak Pu Narendra Modi hruaina chak tak hnuaiah India chu khawvela ram thang chak berte zinga mi a ni a. Kan ram, kan thil siam chhuah leh hnam ziarang hausa takte hi kan ngaihluin kan chhuang hle tur a ni. Hnam ziarang leh nunphung hrang hrang kara kan inunau tlatna hi kan chakna hnar, ram dangte ngaihsan a ni a, i chhawmnung zel ang u. Mipuite an inpumkhata, ram tana lungrual taka an beih phawt chuan ram hi a thangin hma a sawn thin a ni.  

Act East Policy kaltlangin Mizoram tiamin India hmarchhak chuan ram chhung hmun dangte ang bawkin hmasawnna a hmu a. Bairabi-Sairang Railway Line hawn takin zin veivah, bungraw thiar, khualhip leh tualchhung mite tana eizawnna siam kawngah hmasawnna leh remchanna tam tak a thlen a. He rel kawng hi Mizoram chhim tawp Zorinpui thlenga kal tir tum niin, kan nghahhlelh em em kum 2027-a chhawr theih tura beisei Kaladan Multi-Modal Transit Transport Project nena thlunzawm tum a ni. Ka mipui duh takte u, heng hmasawnna ruhrel lian leh danglam dawrhna thlen theite hi tha taka lo dawngsawnga, tangkai zawka hmang thei tur chuan rilru lam thlenga kan lo inpuahchah lawk a ngai a. Hemi tur hian hmathlir kan tih zauh mai bakah kan state ramri leh inchhung lum piah lam thleng kan ngaihtuah a ngai a ni.  

He hun lawmawm takah hian Mizoram that  danglam bikna hrang hrang, khawtlang ralmuang, ziak leh chhiar tam, sik leh sa nuam, boruak tithianghlim, Dan zawm tha leh khawtlang inpawh kan nihnate hi hmasawnna chak zawk thlena, Mizoram hmasawn Viksit Mizoram siam nan hman tangkai tum ang u. Kan tihpuiltlin theih phawt chuan Prime Minister-in uar taka a aupui kum 2047-a India ram hmasawn Viksit Bharat siam tumnaah hian kan state chuan chanvo pawimawh tak a hlen thei dawn a ni. Mizoram hi India ram hmun pawimawh taka awm anih avangin ram pum himna turin khua leh tui tin ten tha kan thawh theia, mawhphurhna pawimawh tak kan nei a ni.  

Mizoram thalai, nakin lawka kan ram innghahna ni mai turte u, danglamna thlen thei thil tha tak tak ngaihtuah chhuak turte, taimakna, mahni kutkawiha eizawnna siam tum tur leh khawvel changkang zelin a thlen thiamna hrang hrangte chhawr tangkai zel tum ang che u. Ruihhlo leh a kaihhnawih ngawlveina lakah inthiar fihlim tlat ula, phone hman chin tawk hria ula, zirlai leh eizawnna lamah theihtawp chhuahin rilru in pe dawn nia. Mahni insiamthat leh hmasawn nana theihtawp chhuah bakah bulhnaia awmte kan puih bawk chuan khawtlang leh state hmasawn nan tha kan thawh tihna a ni. 

Mizoram hi nungchang mawi leh zahawm tak Tlawmngaihna lantirna ti a hriat hlawh a ni a, hei hi tunhnai furpui avanga leimin leh kawng chhe kara harsatna tawh tumte khan ataka hmuh theiha lantir a ni. Khualzin tangkhangte leh damlo puih ngaite hmangaih taka chhawmdawl an ni kha Tlawmngaihna vang liau liau a ni. Tha thawhtu zawng zawngte zahna chibai ka buk che u a, he thiltih ropui tak hi in chhawmnung zel dawn nia.  

Furpui kan la hmachhawn mek zel avangin chhiatrupna la thleng thei reng a ni a. Hmun him chinah awmin in vela thil thlengte ngaihven reng ula, hotute thupek leh inkaihhruaina tih chhuahte tha takin zawm turin mipuite ka chah a. Tlawmngaihna inchhuah tawh thin chhawmnung zelin tanpui ngaite pui zel ang che u. 

In zavaiin Independence Day chibai ka buk nawn leh vek a che u. 

Thank you.

Jai Hind.

Ka lawm e.