Ni 22.7.2017 (Inrinni) khan Mizo Hmeichhe Insuihkhawm Pawl(MHIP) General Headquarters  leh Aizawl Khawpuia Branch te tangrualin 'Hmeichhia leh Naupangte Hmasawnna leh Venhimna' tih thupui hmangin I & PR Auditorium-ah Seminar an buatsaih a. Pi Lal Riliani, President, Indian Society on Tobacco & Health (ISTM) Mizoram Chapter leh MHIP Patron ni bawk chuan khuallian niin Seminar hi a hmanpui a ni. 

MHIP Patron Pi Lal Riliani chuan khawvel a changkan chhoh rualin sualna pawh a pung chho a, hmeichhia leh naupang te chunga hleilenna pawh a pung chho  zel a, tunhma Dan leh Hrai hriatloh avanga ngawih bo pui thin thil tamtak chu vawiinah chuan mipui-mimir kan harh tawh avangin sawichhuah nachang kan lo hre tawh a, nasa lehzuala inziritirna kan neih hi a pawimawh lehzual a ni, a ti a. Tunhma ngaituahin kawng tin renga hmeichhia ten hmasawnna, thiamna leh theihna kan nei hi a lawmawm a, thiamna atang hian kan dikna leh zahawmna chanvo kan  hauhin kan vawng dawn a ni tiin tawngkau chhehah hmeichhiate dah hniamna nasa thin, tunlaiah hriat tur leh hmanna a awm tawh lo te hi a ropui a tih thu a sawi bawk.  

Pi Lal Riliani chuan Naupangte hi nakin atana Investment an ni tih hrelo nu leh pa tam tak kan awm thu te, naupangte hi Pathian hnen atanga kan Rochan an nih thu te sawiin enkawl a mi puitlinga chherchhuah hi Nu leh Pa te mawh (responsibility) a ni, a ti a. Vanduai thlak takin vawiinah kan ramah hian naupang, Nu leh Pa enkawl loh Nau Hnuchham leh Enkawlna In hrang hrangah hmuh tur an awm tam hle mai. Mizote Kristian kan nihna nen a inhmeh lo hle a ni, a ti a. Society tlemte, in hnaih taka khawsa ho - chhiat leh thatah pawh inpei zawn tel tel thin kha heti tak maia vawiina kan rama naupang Nu leh Pa enkawl loh thahnem tak lo awm ta hi engvang nge tih nguntaka a bul thum atanga kan chhut ngun a tul tih a sawi a. Naupangte hian naupan lai hun nuam taka an hman hi an chanvo (Right) a ni a, chutiang kan siam sak thei lo anih chuan nu leh pa ni tlak kan ni lo tihna a ni, a ti a. Naupang chunga hleihlenna a thleng fo thin chu pawi a tih thusawiin heng te hi a thlen zel loh nan khawtlang, pawl leh Sawrkar te tan ho a tul thu a sawi bawk. 

Hmeichhiate leh Naupangte hmasawnna leh venhimna chungchang ah dan thatak tak a awm thu sawiin heng Dan te hi kan hriat loh avangin hma lak loh thin a ni, a ti a. Heng Dan leh Hrai Bu thatak tak te hi tuna Mizoram State Service Authority in Mizo tawng ngei a a lehlin leh buatsaih te hi zau thei ang bera thehdarh a inzirtirna neih nasat ni se kan ziaawm phah ngeiin a rinawm, a ti a. Kohhran hrang hrang leh MHIP pawhin Branch hrang hrangah zau zawka thehdarh hna hi thawk sauh sauh ila, reiloteah kan ram zimte angah hi chuan HARHNA (AWARENESS) kan nei thuai mai in a rinawm, a ti bawk. 

Seminar hi Pi Saipuii, President MHIP Gen. Hqrs in a kaihruai a, Pu Lalnunsiama, Advocate leh Legal Adviser, MHIP Gen. Hqrs. in POSCO Act leh Women's Right tih paper a buatsaih zirho a ni a, Pi Vanlalruati Lecturer, SCERT leh Senior Adviser, MHIP Gen Hqrs in hemi chungchang sawizauna a nei bawk a ni.