Vawiin khan MHIP Sub-Hqrs. Mamit Conference Vawi - 16 na chu Mamit Bazar Veng Hall-ah neih a ni a. Er H. Lalzirliana, 3-Mamit Bialtu MLA chuan khuallian niin a hmanpui.

Khuallian chuan Mizo hmeichhiate chu kawng engkimah an nep lo a, hmeichhia an nihna chu insit phah nana hmang lo turin a chah. Hmeichhiate chu khawvela miropui leh hriat hlawh tak takte hringtu innih theih vek bakah, nu nihna hrim hrim pawh hi thil ropui tak a ni a ti. MHIP-te chu Sorkar chawmdawltu leh tichaktu mai bakah sorkar khalh ngil kawngah pawh theihna nei an ni tih inhrethar turin a chah bawk.

Bialtu MLA chuan Mizo hmeichhiate huaisenzia sawiin tawng thiam lo chung pawhin ram hla tak tak thlengin sumdawng tur pawha an thlen ngam thu a sawi a, an huaisenna chu a ngaihsan thu a sawi bawk. Mizo hmeichhiate chu chhelna leh tumruhna tak tak nei an ni a, mahni chhungkua theuh khaidingtu leh chawmtu hmeichhe tam tak an awm chu a ropui hle a ni a ti bawk.

Khuallian chuan tunlai khawvelin a buaipui mek COVID -19 Novel Coronavirus hrileng mek avanga Sawrkar thuchhuakin mipui pungkhawm tam zawnga programme siam lo tura ngenna a nei nachungin Sub-Hqrs. MHIP Conference hunrei tak atanga lo inbuatsaih tawhna hrethiam a, kaltlang pui anihna- ah thuneitute hnenah lawmthu a sawi a, MHIP Sub-Hqrs. huamchhungin hruaitu tha tak tak an nei chu lawmawm a tih thu sawiin hruaitu tharte duhsakna a hlan nghal bawk a ni.

Pi Gracy L. Bawitlung, CJM Mamit /Sub-Hqrs. MHIP Adviser pawhin "tu leh fate ruihhlo laka venhim leh chhanchhuak tura tanlak" tih thupui hmanga thusawiin MHIP members kalkhawmte chu vaihlo do turin a chah a, Kuhva leh Gudkha chi reng reng lakah an fate fihlim tura tan la tura chahin naupang kumtlinglo, vaihlo leh a kaihnawih chi reng reng lei tura dawra tir lo turin kalkawmte a chah bawk a ni.

Vawiin vantlang inkhawm hi Pi L.R Zampuii, President MHIP Sub-Hqrs, Mamit chuan a kaihruai a, Mamit Sub-Hqrs huamchhunga members boralte sunna hun hman a nih bakah Sub-Hqrs MHIP huamchhunga Member chawimawi phu, Hruaitu hlun mi 3, Thisen pe hnem mi 4 leh National Awardee mi - 1 an vaiin mi 8 te hnenah chawimawina hlan an ni.

MHIP Sub-Hqrs Mamit Conference hi nimin atang khan neih tan niin rorel inkhawm nimin khan neih a ni a. Kum 2020 - 2021 chhunga Sub Hqrs MHIP hruaitu thar thlanna tukina neihah heng mite hi thlanchhuah an ni.
1. President - Pi LR. Zampuii
2. Vice President - Nl. Sapliannguri
3. Secretary - Nl. Lalzamliani Khiangte
4. Asst Secy - Pi R. Lalrinpuii
5. Treasurer - Pi Lalthlanhlui
6. Fin Secy - Pi H.D Darrimawii te an ni a.

Kum 2022 Sub Hqrs MHIP Conference hi Dampuiah neih leh a ni ang.