No.543/2021-2022

Aizawl the 17th May, 2021 : Vawiin khan Chief Minister’s Relief Fund hman dan tur ngaihtuahtu atana din Committee on Utilization of Chief Minister’s Relief Fund for COVID-19 chu an Chairman Pu Lalnunmawia Chuaungo, Chief Secretary hovin Chief Secretary’s Conference Hall, MINECO-ah an thukhawm. Lockdown puan chhunga harsatna tawk, chhuanchhamte tanpui nan cheng nuai sawmkua pakhat leh singnga (Rs.91,50,000) semchhuah an remti a. He committee-ah hian Addl.Chief Secretary Pu JC Ramthanga chu Co-Chairman niin, Finance Commisioner Pu Vanlalchhuanga chu Member Secretary a ni a, tlawmngai pawl NGO Co-ordination Committee aiawh Pu Vanlalruata CYMA President leh Mizoram Kohhran Hruaitute Committee (MKHC) Secretary Rev Lalrinsanga te chu member an ni.

Aizawl District huamchhungah chhungkaw 3074 zet chhuanchham Aizawl DC hnena report thehluh a awm tawh a. Heng mite tanpuina tur hian Aizawl DC kutah Rs.61,50,000 dah ni se tiin meeting chuan a rel a. Lunglei leh Kolasib District ah Rs.5,00,000 ve ve dah a ni ang a, District dang zawngah Rs.2,50,000 theuh dah a ni thung ang. CM Relief Fund tlingkhawm atanga chhawmdawlna leh mamawh danga sum sem chhuah chhunzawm zel dan tur chu a tul dan ang leh District tina Deputy Commissioner te rawtna hmuh dan a zirin ngaihtuah a ni ang.

COVID19 hrileng tihziaawm a nih theih nan April ni 19 atang khan Mizoram chhungah inkhuahkhirhna lockdown kalpui tan a ni a. Hemi avanga harsatna tawk, a bik takin Aizawl khawpui chhungah mi engngemawzat an lo awm ta a. Mahni veng leh khaw chhungah chhuanchham an awm lohna tura chhawmdawl hna chu LLTF leh VLTF ten an thawk mek a. LLTF leh VLTF ten chhawmdawl hna an thawh mek thlawp a, an tha tichak tur leh puibawm turin meeting chuan CM Relief Fund atang hian sum pekchhuah hi a rel ta a ni.

Nimin 16.05.2021 (Pathianni) thleng khan CM Relief Fund-ah hian sum Rs 22,98,84,954 a lut tawh a. Heta tang hian Rs. 21,33,60,970 hman chhuah a ni tawh a. Tun dinhmuna sum neih zat chu Rs.1,65,23,984 a ni.