No.544/2021-2022

Aizawl. 17th May, 2021 : Vawiin khan Rural Development department Minister Pu Lalruatkima’n Life Insurance Corporation of India (LICI) hnen atanga an hmuh PPE 1400 chu Health Minister Dr. R. Lalthangliana hnenah an hlan.

Health Minister Dr. R. Lalthangliana chuan Mizoramin kan mamawh em em mai PPE thahnem tak mai RD department in LICI kaltlanga an lo hmu chu lawmawm a tih thu sawiin, PPE hi engtiklai pawhin kan mamawh a ni a, engemawzat kan chah mek a, kan beisei em em lain a rawn thleng thei lo bawk nen kan mamawh zual lai taka kan dawng hi a lawmawm takzet a ni, a ti. Dr. R. Lalthangliana chuan PPE hi tundinhmunah ZMC ah hian nitin 200 vel kan mamawh a, CCC, Quarantine Centre leh Frontline workers ten an mamawh reng bawk a, ZMC ah phei chuan khum engemawzat dah belhna tur ward thar kan hman hunah 200 aia tam fe hi nitin kan mamawh dawn a ni, a ti. India ram pumah demand a san avangin duh angin a hmuh nghal zung zung theih thin lo a ni tih sawiin, Rural Development department leh Life Insurance Corporation of India (LICI) chungah lawmthu a sawi.

Minister chuan khawvel ram hrang hrang atangin sawrkar laipui kaltlangin Oxygen Cylinder leh Oxygen Concentrator thahnem tak kan dawng a, heng min petute leh rang taka min phurh thlen sak thintu Indian Air Force-te chungah lawmthu ka sawi a ni, a ti a. COVID-19 hripui len tan tirha RT-PCR laboratory atana kan hman ZMC-a TB laboratory pawh hman ngai tawh lovin, ICMR-in Virus Research and Diagnostic Laboratory (VRDL) changtlung tak min din sak avang leh heta thawktu scientist bakah staff engemawzat kum 3 chhung rawihna tur min tum sak a, RT-PCR test kit pawh 25,000 lai mai a thlawna min pek avangin lawmthu ka sawi a ni, a ti a. VRDL ah hian RT-PCR 3 leh RNA-extractor 3 hmangin sample test char char a ni, a ti.

Health Minister chuan COVID-19 hri kai tharte zinga 70% chu Aizawl khawpui chhung ami an ni a ti a, hetih rual hian Mizoram hmun tinah he hri kai hi report an awm a, tumah inthlahdah thei kan nil ova, sawrkar ruahmanna thuawih taka kan zawm hi kan himna atana pawimawh tak pakhat a ni, tiin mipuite dawhtheihna nen thuawih hram hram turin a ngen a, thahnemngai taka duty thin VLTF leh LLTF te bakah sawrkar hnathawkte chungah lawmhtu a sawi bawk.

RD Minister Pu Lalruatkima chuan Mizoramin COVID-19 kan hmachhawnna kawngah RD department tangkai ve theih dan tur kawng hrang hrangin kan dap a, Life Insurance Corporation of India headquarters, Mumbai-ah Corporate Social Responsibility (CSR) kaltlanga Mizoram tan hma rawn la turin kan ngen a, kan ngenna ngai pawimawhin PPE leh three-layer mask tam tham tak min pe a, three-layer mask hi LLTF duty te hnenah kan sem tawh a, PPE pawh hi engemawzat chu Community Covid Care Centre (CCCC) hrang hranga duty-te hman turin hlan a ni bawk a, sawrkarin tangkai taka a hman turin 1400 hi kan hlan leh a ni, a ti.

Vawiin Health Minister hnena PPE hlan zat hi PPE Full Kit (PPE suit, pheikhawl khuhna, face mask, face shield, waste bag) 1310 leh PPE suit 90 a ni.