Chief Minister Pu Lal Thanhawla chuan ‘Mi hausa ten hetiang taka football an phur pui hi a ropui hle a, Mizoramah pawh kan la neih ve ngei a beisei awm a ni’ a ti. He thu hi vawiina Independence Day Invitational Football Tournament Final, A.R.Lammuala Shillong Professional Football Team pahnih Lajong FC leh Royal Wahingdoh FC inkhelh dawna a sawi a ni.

Chief Minister chuan Shillong football professional team ten he Independence Day football tournament huaihawttu, Mizoram Football Association sawmna ngai pawimawha an rawn khel thei chu lawmthu a sawi a. Shillong football team chhuanawm tak, India hmarchhak atanga I-League a khel hmasa ber, football lama tawnhriat ngah tawh takte atang hian kan nauten zir tur leh tangkaipui tur an hmuh ngei a beisei thu a sawi a. Infiamna a Mizo thalaiten tun kan dinhmun aia sang zawk an thlen theih nan sorkar chuan theihtawp a chhuah reng a ni a ti.Tournament buatsaihtu MFA chungah pawh lawmthu sawiin, Pu Lal Thanhawla chuan tun aia sang zawkah min la hruai chhoh ngei ka beisei a ni a ti.

Independence Day Invitation Football Tournament ah hian final ah Shillong Club 2 in tumin Lajong FC chuan an khingpui Royal Wahingdoh FC chu si li (4) faiin an hneh a ni.

Tournament Champion hian lawmman Cheng nuai 1 leh trophy an dawng a, Runner-up in cheng sing 5 leh trophy an dawng bawk a ni.

Mizorama Independence Day Footbal Tournament hi kum 1982 atang khan Mizoram Football Association in buatsaih tanin, kum tin, 1986 tih lovah, buatsaih thin a ni a. Kumina tournament buatsaih hi a vawi 29-na a ni.

Final inkhelhna ah hian All India Football Federation (AIFF) Vice President, N.E.Bialtu Pu Ankur Dutta chu khualzahawm niin, Mizoramah professional football club din ve hlan a nghahhlelh thu a sawi a; Mizoram sorkarin thalaite tana a hmalakna chu fakawm a tihthu a sawi bawk a ni.

Chief Minister hi a nupui Pi Lal Riliani bakah Home Minister Pu R.Lalzirliana, Sports Minister Pu Zodintluanga leh Pu KS Thanga Parliamentary Secretary ten an tawiawm a ni.