Mahni chenna tur in leh lo din thei lo mi rethei te tana chenna in tha tak sak sakna tur rahmanna Rajiv Awas Yojana (RAY) Pilot Project chu vawiin chawhnu dar 1:15 khan UD&PA Minister Pu Zodintluanga’n I&PR Auditorium ah a hawng.
Minister chuan thu sawiin Mizoram Sorkar chuan sum harsatna karah mitheite chu Sorkarin a ngaihpawimawh avangin an hamthatna tur leh chawikanna tur chu theihtawpin a thawk chho zel dawn a ni, a ti a. Aizawl khawpuia ah mahni chenna tur in leh lo din thei lo sang tam tak ten sum puka harsa taka in sa tura hma an lak laia Sorkarin ruahmanna engkim siamsaka in leh lo tha tak a dinsak tur chu an vanneihzia hriaa rinawm leh dik taka thawk theuh turin a chah a, an tu leh fate tana thawk an nih hre renga diklo taka sum hmang lova, thahnemngai taka Sorkar hmalakna tihlawhtlingtu nih tum theuh turin a fuih bawk. Sorkar Laipui atanga endiktu leh UD&PA Department ten uluk takin an vil reng dawn a ni tiin Minister chuan an thawh that leh that lovah Project kalpui chhunzawm zelna tur thui takin a innghat dawn a ni, a ti.
Aizawl East I bialtu MLA Pu R.Lalrinawma, Deputy Speaker pawhin mirethei te chenna tur in sakna tur RAY Pilot Project a biala siam a nih dawn avangin lawmthu a sawi a, chuta cheng tur pawh uluk taka, political party thlir lova mamawh te thlanchhuah an nih dante a sawifiah bawk.
RAY Pilot Project hawnna inkhawm hi Parliamentary Secretary Pu Hmingdailova Khiangte-in a kaihruai a, UD&PA Joint Director Pu Zarzoenga’n Project sawihawnna neiin hmarchhak state dang zawnga khaw pahnih khat te te thlan an nih laiin Mizoramah khaw 8 thlan a nih thu a tarlang a. Project hnuaiah In pakhat sak nan sum Rs 4,87,000 /- ruahman a nih dante a sawifiah bawk.
RAY-in a tum bulpui ber chu kum 2022 (India independence kum 75-na) ral hmaa “Slum Free India” siam a ni a. Khawpui chhunga mirethei chena tur in neilo te tan chenna tur in luah tlak tha tak an neih ve theih nan kawng hrang hranga hmalak tum a ni. Slum area/pocket-a mi an chenna chhan bulpui ber pakhat chu chenna tur In mumal an neih loh vang a ni a. Tin heng hmunah te hian khawpui lailuma cheng ten nitin khawsakna atana an hman thil tam tak an hmu pha ve lo a. He RAY scheme hian chenna In sakna piahlamah basic civic amenities (inkalpawhna kawng, tuiluankawr, electric/tui connection, hriselna lam thil leh a dangte) siamna turte a huam tel bawk a ni.
RAY scheme hi Mizoram-a District khawpui zawng zawngah kalpui tum a ni a, tunah hian UD&PA Department chuan District Headquarters zawng zawngah Preliminary Survey an nei zo vek tawh bawk a ni. Pilot Project tura ruahman hi DPR buatsaih laia a hmun remchang veka ngaih kha hnathawh tak tak dawna harsatna a awm tak avangin Zuangtui hmuna lenglo zawng chu Falkland, Aizawl-a UD&PA Department-in ram a neihsa ah sawn tura ruahman a ni.
RAY Pilot Project atan hian Rs 1,120.01 Lakhs pawm a ni a. He sum hmang hian mimal chenna In 78 sakna tur leh In luah hawh tur 64 sakna tur bakah ruahtui khawlna, kawngpui, tuihawk luan kawr, solar lighting (inchhung leh khawlai), septic tank, multipurpose community centre, livelihood centre leh mini park siamna tur te a huam vek dawn a ni.
Vawiin RAY hawnna ah hian a dawngtu tur beneficiaries 38 thlan fel tawh zingah first phase ah mi 20 hnenah khualzahawm Pu R.Lalrinawma chuan Bank Pass Book a hlan nghal a. RAY hawnna hi UD&PA Secretary Pu R.Lalvena, IAS, Pu R.Lalfanliana, Er-in-Chief, PHE leh officials dang ten an hmanpui bawk a ni.
