Kuthnathawktute tana hmasawnna tura National Bank for Agriculture and Rural Development (NABARD)-in a hmalakna pakhat, Mizorama kalpui tan tur - “forward leh future market” chungchang inzirtirna vawiin khan Champhai I&PR Conference Hall-ah neih a ni a. He hunah hian Champhai DC Pu Zoengsanga chu Khuallian niin, Bankers-te leh PACS-te tan zirtirna hi pek a ni.
DC Pu Zoengsanga chuan kuthnathawktuten hlawk tham turin leh risk pumpelh tura hma an la dawn a nih chuan market rate-te hriat a ngaiin, an hlawkna tur thlai leh a hralhchhuah hun tur tha ber thlengin an hriat a ngai a ni, a ti a. Chumi atan chuan vawiin awareness programme-a an zir tur chu a pawimawh hle a ni, a ti a. Pu Zoengsanga chuan Mizote kan taimak thu sawiin, remchanna a awm fuhloh vanga kuthnathawktute pawh an hlawk theih tur anga hlawk zo lo te pawh an awm thin thu sawiin, heng an tana thil tha tak tak chhawpchhuahte hi a nih dan tura dik taka kalpui a nih theih nan a hrilhfiahtute lamin an thiam a ngai a ni, a ti a. Vawiin an thil zir tur pawh chu programme-a kal te mai bakah, mipuiin an chhawr tangkai theih a beisei thu a sawi a ni.
He huna Khualzahawm Pi Emily Lalrinpuii, Champhai District IPRO chuan NABARD hmalaknate chu kuthnathawktute tana tangkai tak tak ni mahse, a hlawhtlinna chu a thawhpui bank leh institution-te tawiawmna ah a innghat thui hle a ni tiin, thawhhona tha tak an neih a beisei thu a sawi a. Bank-a thawkte chuan anmahni dawrtu a lian ber atanga a te ber thlenga hawihhawm leh tlangnel taka lo be thin a, hriatthiamloh lai awm theite pawh inhrilhfiah thin ni se a tih thu a sawi bawk a ni.
He huna thusawitu dang Pu Pradip Nandi, Chief Manager (LB), SBI, Champhai chuan Future leh Forward Market chu Mizoramah chuan thil thar a la nih thu leh, kuthnathawktute tana thil tangkai tak tur a nih avangin banker-te tan pawh thil phurawm tak a nih thu a sawi a ni.
Vawiin hun, Pu Lalthanpuia, Manager, APEX Bank, Champhai kaihhruaiah hian Pu J.D. Traite, Asst. Project Manager, NABARD, Champhai chuan zirtirna hi a pe a. Forward leh Future Market hnuaiah hian nakin hun (future)-a buh leh thlai leh bungraw hrang hrang man tur chhut lawkna (index) hmangin hun ruat lawka indawr turin inremna siam lawk thin a nih thu a sawi a. Inhrilhfiahna film tawi en in, zawhna leh chhanna hun te vawiin hunah hian siam a ni bawk.
