Tunhnaia Tuikuk hel ten ABCI Ltd mi pahnih an rukbo, Mizoram Police tena an zuk chhanchhuah chungchanga Chief Minister Pu Lal Thanhawla thuchah vawiina a sawi chu hetiang hi a ni.
"Nimin lawka Bru hel ten kam rama development hnathawk mektu ABCI engineer te an rukbo chhanchhuah kawngah Mizoram Police te hmalakna hi a ropui ka ti a, chhunanawm ka ti. Tin, kan Home Minister zahawm takin hetiang taka hma an lakna tur order khauh tak pe in, phur taka, thuawih taka an kal theihna turin a tul zawng zawng sum leh pai nen lam a ngaihtuah sak hi ropui ka ti a, a ngaihna pawh hria ka ti a, a lawmawm ka tiin, a hnenah lawmthu ka sawi a. Tin, Addl SP Pu Thangzuala kaihhruai kan police ho ten hetianga mi engemawzat nena fimkhur taka chhuia, thiam taka veha an va nangching thei kha a ropui a, a lawmawm a ni. An thiamna a sang ka ti a, an va chhanchhuak ta kha a lawmawm em em a ni".

"India ramah hian inrukbona a awm zauh zauh a, suma tlan ngai an awm nual zel a, tun tumah hian kan police huaisen ten suma tlan ngai miah lova hetianga misual ten an rukbo an chhanchhuak hi lawmawm ka ti tak zet a ni. Amaherawhchu misual ten an tlanchhiat paha an mi rukbo pakhat an han kap hliam erawh hi chu a dawihzep thlak hle a ni. Tin,hel ten an kah hliam pawh kan police ten tha takin an enkawl a, kan mi tlawmngai ten an lo tawiawm a, Aizawl Civil Hospitalah kan doctor ten enkawl nghalin an zai nghal a. Chung ang hunah te pawh chuan kan Home Minister zahawmtak Pu Zira'n a awmpui ve a, a hliamte tan leh a chhawrtute tan pawh a thlamuan thlak em em a ni. Hetiang taka kan Home Minister leh police ten hma an la hi a lawmawm ka ti a, a chhuanawm ka ti. Kan sorkar an ti hmingtha a, kan ram kan hnam an chawimawi hle a ni."

"Tun thla hi Zorama remna leh muanna kan neih kum 25-na alo ni chiah leh nghal a. Chumi hun in nangchinga hetianga remna leh muanna venhimna kawngah man tam tak pek ngaite pawh an la pe chho zel hi a lawmawm hle a ni. Kan police te hi anmahni kan rintawk chuan an hmantlakzia leh an rin ngamzia an tilang a, sorkarin kan police te a ring em em a ni. Tin misual zawnna kawngah te leh engemaw crime sualna chi hrang hrang chhuichhuahna kawngah te pawh a ring hle a.Hna pawh an thawk tha hle a ni. Tin, silai tawlh ruk te pawh a vang tawh a, silai rawn tawlh rukte pawh hi an man chho zel a, hei hi thil ropui tak a ni. Tun Remna leh Muanna kum 25-na thlaah hian kan remna leh muanna hi venghim turin police te chauh nilovin, Mizo mipui zawng zawng mawh a ni tih hre thar leh ila, remna leh muanna kan neih hi a to a, a venhim nan leh vawn him nan pawh a man a to anih pawhin mipui ten theihpatawp kan chhuah zel tur a ni."

"Kan police ten heti taka hma an la hi a lawmawm ka ti a, chuvangin kan khawpui khawlaite leh Zoram pumpui mai hi misual tena min tih raltitna laka mipui venghima, thlamuan a, enkawltu tha tak an ni tih mipuite pawhin hria a, an nin thlamuanna tlaka an thawh zel hi kan duhsak a. Chutiang taka an thawh theihna tur atan kan sorkar pawhin a theih ang ang, a tul an anga enkawl zel a tum a ni."

"Chuvangin kan police te pawh phur taka thawkzui zel turin ka duh a, mipuite pawhin a remchang leh kan theihna apiangah an ni, min venghimtu te hi kan tanpui tur a ni tih hi inhre thar leh ila a lawmawm khawp ang."