Vawiin khan School Education Minister Pu H. Rohluna leh Public Health Engineering Department Minister Pu Zodintluanga hovin PHED Minister office-ah Midday Meal kalpuina Govt. Primary leh Middle School-te a tui mamawhna leh tui bill chawi harsatna chungchang sawiho a ni. Parliamentary Secretary Pu Hmingdailova Khiangte telin, School Education leh PHE Department officer-te an kal khawm a ni. 

India Sorkarin naupang zawng zawngin elementary education an neih theih nana a hmalakna pawimawh tak zing a mi Midday meal pek thin hi zirlai leh nu leh pa ten chhawr tangkai hle a. Amaherawhchu hemi atana Sorkar-in sum hman tur a bituk hian chaw leh a hmeh tlem leina bak chu a daih loh thu meeting-ah tarlan a ni a. Chaw chhum nan te, in tur atan leh thil dang dang atan tui thianghlim mamawhna a san zia leh chumi atan chuan a hranpa a pawisa pek a awm loh avangin Mizoram school hrang hrangah an zirtirtuten pawisa thawhkhawm in emaw, Annual Grant atang emaw te in tui bill an pek mai thin thu te tarlan a ni. School ten Annual Grant an dawn hi a tlem tham avang leh, a hmanna tur a tam bawk si avangin an indaihlo thin hle a ni. 

Midday Meal pekna School a tui thianghlim pek hi Universal Elementary Education hlawhtlinna atan thil pawimawh tak a ni tih hriain he meetingah hian Mizoram district hrang hranga Sorkar enkawl Primary leh Middle school, PHED tui connection nei te chu kum hnih chhung thlatin tui litre 5,000 a thlawn a pek turin leh, kum hnih hnu a he ruahmanna hi ennawn leh turin rel a ni.