Vawiin khan Lawngtlai District Hospital-in damdawi in fai leh thianghlim inelna Kayakalp Award 2017 a dawn theih nana inbuatsaih dan tur sawi hovin Lawngtlai District Medical Superinrtendent (DMS) office-ah Lawngtlai Bawrhsap Dr A. Muthamma IAS hovin department hrang hrang leh tlawmngai pawl ai awhte an thu khawm. 

He hunah hian Lawngtlai DC chuan Kayakalp Award chu damdawi inte'n faina leh thianghlimna kawnga hma an sawn theih nana hma lakna chi khat a nih thu sawiin, damdawi in leh a chhehvel leh hmanraw hman te a lo thianghlim chuan damlote paw'n an dam chak phahin mipuite paw'n an pan duh phah dawn a ni, a ti a. Lawngtlai District Hospital chuan he award hi lo dawng pha ta chiah lo pawh ni se, dawng tura inbuatsaihna leh hma lakna chuan rah tha chhuahin, hmasawnna tam tak a awm phah dawn a ni, a ti bawk. 

Lawngtlai DMS Dr Lalmalsawmi chuan Kayakalp Award dawng tura an inbuatsaih tawh dan leh tih tur hmabak la awmte a sawi a. Lawngtlai Florist Association leh tlawmngai pawl dangte'n damdawi in chhehvel cheia tum hnih lai an hnatlanpui tawhna leh sawrkar department hrang hrangte thawhpuinaah lawm thu sawiin, la tawiawm zel turin a sawm nghal a. Tun hnaia Lawngtlai District Hospital-in hmasawnna thar a neihte tar langin, damdawi in chu a enkawl leh vawn fai kawngah mipuite'n kan ta leh kan tan a ni tih kan hriat a pawimawh a ni, a ti bawk. 

Kayakalp Award 2017 atan hian August thla tir hian damdawi in en fiah tur team an lo kal dawn a. Vawiin hian damdawi in leh a chhehvelte zan lama a en zawk theih dan tur te, tui thianghlim zawk a awm theih dan tur te, damdawi in chhehvel thing leh pangpara chei mawi dan tur te, a hmun sam fai leh tifaia tlawmngai pawlte'n an hnatlanpui theih dan tur leh, hemi kawnga mipuite zirtir a, hma laknate zau zawka puanzar a nih theih dan tur te sawi ho a ni a. Lawngtlaia sawrkar department leh tlawmngai pawl hrang hrangte'n thawhpui an inhuam thu an sawi a ni. 

Tun hnaiah Lawngtlai District Hospital-a thawk tur hian sawrkarin doctor pathum a rawn dah belh a. NEDP atangin Endoscopy khawl lei thar a ni bawk a. Hemi avang hian damdawi in thuneitute chuan sawrkar laka an lawm thu an sawi a ni. Lawngtlai District Hospital-ah hian OPD leh damdawi in tluang taka kalpui a nih bakah, kar tin tum hnih ultrasound tih thin niin, Sick Newborn Care Unit (SNCU)-ah nausen piang hlim leh nausen damlote a thlawna enkawl thin an ni a. Hriselna kawnga hma lakna peng (programme) hrang hrang pawh chak taka kalpui chhoh ve zel a ni bawk.