Mizoram Food Processing Research & Training Centre (MFPRTC), RIPANS leh Food & Drugs Administration, Directorate of Health & Family Welfare tangkawpin an buatsaih Aizawl leh a chhehvel veng hrang hranga bekang uma eizawng mi 26-te tana training buatsaih “Certificate Course on Hygienic Fermentation of Bekang” (Ei tura atana thianghlim bekang um zirna) chu vawiin khan MFPRTC-Seling ah tan a ni a, he training hi ni 4 chhung neih a ni ang.

Training hawnna inkhawma thu sawiin Dr.H.Lalhlenmawia, HOD, Dept of Pharmacy, RIPANS chuan bekang eisual palh avanga buaina leh harsatna kan tawk ta zeuh zeuh a, damdawi lam mithiamte leh mi chinchang hria leh ngaihtuah miten an vei hle a, hetianga bekang uma eizawngte mumal taka training buatsaih a ni thei ta hi a lawmawm hle a ni a ti. Bekang umtute chu bekang um dan zirtir an ni dawn lova, bekang umah hian engtinnge micro-organism leh bacteria (hrik) hlauhawm a lo pian theih dan leh chumi lakah chuan engtinnge inven theih ang tih zirtir an ni zawk dawn a, chu chu a takin sawngbawl dan chi (method) 5-in bekang an um ang a, laboratory-ah an en ang a, a tha ber chu chin chhunzawm tum a ni a ti bawk. Dr. Hlenmawia chuan eitur siam chungchang zirchianna leh zirna in MFPRTC a lo awm ta chu Mizote tan a vanneihthlak a, he programme sponsor-tu NEDP-EDS leh Food & Drugs Administration te chungah lawmthu a sawi bawk.

Training hawnna inkhawm kaihruaitu MFPRTC enkawltu Pu Joseph L. Ralte chuan hman a ta tawh Mizo chawhmeh bekang um dan hrisel leh thianghlim zawk zirna chu Mizo mipuite mamawh chhanna pakhat a ni tiin training chhung hian bekang uma eizawngten  an hriattur ‘Food Safety Standard’ chungchang thu te, FSSAI registration chungchang te, entrepreneurship chungchang thlengin zirho a ni dawn a ni, a ti.

Attachment

• Loading attachment...