Vawiin khan Lawngtlai District Research Officer (DRO) office building thar chu H&TE changtu Parliamentary Secretary Pu H. Zothangliana’n a hawng.

Pu H. Zothangliana chuan office building a hawn hnua DRO Conference Hall-a hawnna inkhawm buatsaihah thu sawiin, Lawngtlaia DRO office building tha tak sak leh hawn theih a ni chu lawmawm a tih thu a sawi a. Economics & Statistics Department chu mipuite hnena statistic rin tlak chhawp chhuak thintu an ni tiin, an hna thawh zarah kan ram hmelhmang chiang takin kan hmuh theih phah thin a ni, a ti a. Statistic chu thil nih dan a nambara sawi fiahna a ni tiin, statistic dik lo chuan thil pawi tak a thlen thei a; chutih rual vek chuan statistic dik leh rin tlak chu ram hmasawnna tur ruahmanna kawnga hmanraw tangkai ber a ni thung, a ti.

Khual zahawm Lawngtlai Bawrhsap Dr A. Muthamma IAS chuan tha taka hna thawh a nih theih nan ruahmanna felfai tak a awm a tul a, chumi tur chuan Economics & Statistics Department chuan rin tlaka hna an thawh a tul a ni, a ti a. Thingtlang khaw hrang hrang dinhmun chiang taka hriat phawt loh chuan hna thawh dan tur a ruahman theih loh thu sawiin, tuna Lawngtlai DRO office building thar hawn a ni ta hian Lawngtlai District hmasawn nan kawngro thui tak a sut a beisei thu leh chak zawk leh rang zawka hna thawk thei turin office pawh thuam that zel ni se a duh thu a sawi.

Hawnna inkhawm hi Economics & Statistics Department Director Pu Lalchhuanawma Hrahsel chuan a kaihruai a. LIKBK General Secretary Rev C. Hrangzuala’n hunserh hmangin, office building satu Mizoram Technocrats Company Pvt. Ltd ai awhin Er C. Lalrinfela’n report a pe a. Lawngtlai DRO Pi H. Chhunkungi’n lawm thu sawiin hun khar a ni a. Office building thar lawmna ruai theh a ni bawk. He hunah hian LADC-a EM leh MDC te, Lai DCC hruaitu leh department hrang hranga officer eng emaw zat an tel.

Lawngtlai DRO office hi kum 2013 August thla khan hawn tan a ni a. A building hi Indian Statistical Strengthening Project (ISSP) hnuaiah cheng nuai sawmruk senga sak a ni. Ni 13.01.2016 khan sak tan niin, ni 08.02.2017-ah zawh fel a ni a. A dung fit 40, a vang fit 30-a zau niin, chhawng li-a sak a ni a. A sak hna vil tur hian Lawngtlai DC kaihhruaina hnuaiah Works Advisory Committee din niin, he building sak nan hian hmanraw hmuh phak china a tha ber ber hman a ni tih a viltu engineer-te’n an sawi.