No.2241/2021-2022

''Educational Technology hman tangkai chu hripui len tawh loh hnuah pawh a tangkai dawn." - Pu L.Thangmawia, Vice Chairman, HRD

Aizawl the 16th, Sept' 2021: Nizan khan Human Resources Development (HRD) Board bultuma Middle School leh High School Science zirtirtuten hripui len laia online-a naupang zirtirna atan Educational Technology hman tangkai dan inkawhhmuhna Webinar zan hnihna neih a ni.

Webinar zan hnihnaah hian Pu L.Thangmawia, MLA leh Vice Chairman, HRD Board chuan khuallian niin he hun hi a hmanpui a. Pu L.Thangmawia chuan naupang zirtir nana Educational Technology hman tangkai chu hripui len tawh loh hnuah pawh blackboard hmanga zirna puitu atan a tangkai hle dawn a ni a ti a. Mizoram-a Science zirna chu kum 1973 hma lamah chuan tih tham a la awm lova, kum 1973 atangin Primary School leh Middle school-ah zir tan a ni a, kum 1986-ah Science & Technology department a lo ding a, department pawimawh tak a lo ni ta a. Hemi hnu hian Science zirna hian hma a sawn chho zel a, tunah chuan Mizoram University a lo awm ta a, Science zirna pawh a tha chho ta zel a ni a ti. Zan hnih chhung Educational Technology hman tangkai zirna webinar chu Science teacher-te fuih tharna leh inchher hriamna hun pawimawh tak a ni tih sawiin, thla hmasaah Mathematics teacher-te tan buatsaih a lo ni tawh bawk a ni a ti. Pu L.Thangmawia chuan Mizoram mila e-content siam te pawh tih theih a duh thu a sawi a, a siam theiten an siam chu siam ve thei lo tan tangkai taka hman theih a ni dawn tih sawiin Science teacher-te tana Webinar neih chu a tangkai hle dawn a ni a ti.

'Webinar on Educational Technology for helping Middle School and High School Teachers during Covid-19 pandemic' zan hnihna hi Pi Zohmingliani, Joint Director, SCERT-in a kaihruai a. Technical session chu Pu Lalhmukima Kawlni, Vice Chairman, STAM-in a kaihruai thung. 'Use of online resources' tih Pu Joel Lalbiakkima, Scientific Officer-in a sawi a. Pi K.Vanlalnghaki, Teacher, Govt. Bethlehem High School chuan a experience a share bawk.

Human Resources Development hnuaiah hian Online Education Committee siam a ni a, he Committee hian Guidlines for Education during prevalence of Covid-19 pandemic a siam chu sorkarah pawh thehluh a ni a, a tihhlawhtlin nan zirtirtute kaihhruai dan tur sawihona consultation te neih a nih hnuah zirtirtute puih nan webinar hi buatsaih a ni ta a ni. Webinar-a tel zirtirtute hian mithiamten an kaihhruaina leh technology hmanga zirtirna tur an kawhhmuhte chu hlawk leh tangkai an tih thu an sawi hlawm a ni. Zan hnih chhung Webinar-a thupui zirte hi Youtube-ah en theih turin dah a ni dawn a ni.

Zan hnih awh zirtirtute tanpui nana Educational Technology zirhona Webinar hi HRD bultumin Directorate of School Education, Directorate of SCERT, Science Teachers Association of Mizoram (STAM) leh Mizoram IT Society te tangkawpin an buatsaih a. Nizan khan Middle School leh High School Science zirtirtu 695 he webinar-ah hian an tel a ni.